𑐩𑐴𑐶𑐮𑐵 𑐳𑐩𑐹𑐴 𑐮𑐎𑑂𑐲𑐶𑐟 𑐄𑐡𑑂𑐑𑑀𑐲𑐞 𑐟𑐵𑐮𑐶𑐩 𑐎𑑂𑐰𑐔𑐵𑐮

𑐫𑐮 – 𑐫𑐮 𑐩𑐴𑐵𑐣𑐐𑐬𑐥𑐵𑐮𑐶𑐎𑐵, 𑐳𑐩𑐵𑐖 𑐎𑐮𑑂𑐫𑐵𑐞 𑐩𑐴𑐵𑐱𑐵𑐏𑐵𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐕𑐰𑐵𑑅𑐫𑑄𑐎𑑄𑐫𑐵 𑐄𑐡𑑂𑐑𑑀𑐲𑐞 𑐰 𑐰𑐎𑑂𑐟𑐺𑐟𑑂𑐰 𑐰𑐶𑐎𑐵𑐳 𑐟𑐵𑐮𑐶𑐩 𑐎𑑂𑐰𑐔𑐵𑑅𑐐𑐸 𑐡𑐸 𑑋 𑐩𑐴𑐵𑐱𑐵𑐏𑐵𑑄 𑐠𑐷𑐠𑐷 𑐩𑐶𑐳𑐵 𑐳𑐩𑐹𑐴𑐫𑐵𑐟 𑐮𑐎𑑂𑐲𑐶𑐟 𑐫𑐵𑐣𑐵𑑅 𑐄𑐐𑐸 𑐟𑐵𑐮𑐶𑐩 𑐤𑑂𑐫𑐵𑐎𑐹𑐐𑐸 𑐏𑑅 𑑋 𑐩𑐴𑐵𑐱𑐵𑐏𑐵 𑐥𑑂𑐬𑐩𑐸𑐏 𑐧𑐵𑐧𑐸𑐬𑐵𑐖𑐵 𑐩𑐴𑐬𑑂𑐖𑐣𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐟𑐵𑐮𑐶𑐩 𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑑅𑐫𑐵 𑐩𑐹𑐥𑐵𑐴𑐵𑑄 𑐫𑐮 𑐩𑐣𑐥𑐵 𑑕 𑐰𑐜𑐵𑐀𑐢𑑂𑐫𑐎𑑂𑐲𑐮𑐶𑐳𑐾𑑄 𑐳𑐵𑐩𑐵𑐖𑐶𑐎 𑐰𑐶𑐎𑐵𑐳 𑐳𑐩𑐶𑐟𑐶𑐫𑐵 𑐡𑐸𑐖𑑅 𑐰𑐶𑐎𑐵𑐳𑐩𑐵𑐣 𑐱𑑂𑐬𑐾𑐲𑑂𑐛𑑄 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐥𑐶𑑄𑐳𑑄 𑐡𑐳𑐶𑐥𑑁 𑐮𑑅𑐯𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐰𑐵𑐳𑐾𑑄 𑐰𑐫𑑂𑐎𑐮𑑄 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐥𑐶𑑄𑐳𑑄 𑐩𑐵𑐐 𑐫𑐵𑐟 𑐢𑐵𑑅𑐳𑐵 𑐊𑐜𑑂𑐨𑐵𑐣𑑂𑐳 𑐎𑑀𑐬𑑂𑐲𑐫𑐵 𑐣𑐶𑑄𑐟𑐶𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐐𑐸 𑐧𑐔𑑄 𑐧𑐶𑐫𑐵𑐡𑐶𑐳𑐾𑑄 𑐟𑐵𑐮𑐶𑐩 𑐎𑐫𑐵𑐡𑐷𑐥𑐶𑑄𑐎𑐾 𑐰𑐶𑐎𑐵𑐳 𑐖𑐹𑐐𑐸 𑐐𑐸𑐞 𑐰 𑐁𑐟𑑂𑐩𑐰𑐶𑐱𑑂𑐰𑐵𑐳𑑄 𑐏𑐣𑐵𑑅 𑐠𑑅 𑐥𑑂𑐬𑐨𑐵𑐰𑐶𑐟 𑐖𑐹𑐐𑐸 𑐏𑑃 𑐎𑐣𑐵𑐡𑐶𑐮 𑑋 𑐰𑑄𑐐𑐸 𑐧𑐿𑐱𑐵𑐏 𑑑𑑖 𑐐𑐟𑐾𑐣𑐶𑐳𑐾𑑄 𑐤𑑂𑐫𑐵𑑅𑐐𑐸 𑐟𑐵𑐮𑐶𑐩 𑐳𑑄𑐔𑐵𑐬𑐎𑑅𑐩𑐶 𑐳𑐸𑐬𑐖𑐰𑐷𑐬 𑐰𑐖𑑂𑐬𑐵𑐔𑐵𑐬𑑂𑐫𑑄 𑐥𑑂𑐬𑐱𑐶𑐎𑑂𑐲𑐞 𑐧𑐶𑐫𑐵𑐡𑐷𑐐𑐸 𑐏𑑅 𑑋

𑐩𑐴𑐵𑐱𑐵𑐏𑐵𑐫𑐵 𑐩𑐴𑐶𑐮𑐵 𑐰𑐶𑐎𑐵𑐳 𑐎𑐵𑐬𑑂𑐫𑐎𑑂𑐬𑐩 𑐀𑐢𑐶𑐎𑐺𑐟 𑐖𑑂𑐘𑐵𑐣𑐷𑐱𑑀𑐨𑐵 𑐩𑐴𑐬𑑂𑐖𑐣 𑐰𑐶𑐱𑐾𑐲 𑐥𑐵𑐴𑐵𑐎𑐠𑑄 𑐗𑐵𑐫𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐟𑐩𑐢𑑂𑐫𑐾 𑐖𑑂𑐫𑐵𑐠𑐪 𑐮𑐎𑑂𑐲𑑂𑐩𑐷 𑐰𑑂𑐫𑐘𑑂𑐖𑐣𑐎𑐵𑐬𑑄 𑐐𑑂𑐰𑐳𑐵𑑅 𑐏𑐮𑑅 𑐩𑐴𑐵𑐱𑐵𑐏𑐵 𑐰 𑐥𑑂𑐬𑐱𑐶𑐎𑑂𑐲𑐎 𑐰𑐖𑑂𑐬𑐵𑐔𑐵𑐬𑑂𑐫𑐫𑐵𑐟 𑐮𑐸𑐩𑐣𑑂𑐟𑐶 𑐔𑐶𑑄 𑐮𑑅𑐯𑐵𑐣𑐵𑐡𑐷𑐐𑐸 𑐏𑑅 𑑋

𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑑄𑐥𑐶𑑄 𑐳𑐴𑐶𑐣𑐵 𑐰𑐖𑑂𑐬𑐵𑐔𑐵𑐬𑑂𑐫, 𑐩𑐠𑐸𑐬𑐵 𑐳𑐵𑐥𑐎𑑀𑐚𑐵 𑐜𑑀𑐚𑐾𑐮, 𑐐𑑀𑐩𑐵 𑐏𑐬𑐾𑐮𑑄 𑐟𑐵𑐮𑐶𑐩𑐫𑐵 𑐀𑐣𑐸𑐨𑐰 𑐎𑐣𑐵𑐡𑐷𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷 𑐰𑐶𑐲𑑂𑐞𑐸𑐩𑐵𑐫𑐵 𑐠𑐵𑐥𑐵𑑄 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐩𑐾𑐪 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷 𑐄𑐬𑑂𑐩𑐶𑐮𑐵 𑐳𑐸𑐰𑐾𑐡𑐷𑑄 𑐳𑐸𑐨𑐵𑐫𑑂 𑐡𑐾𑐕𑐣𑐵𑐡𑐷𑐐𑐸 𑐏𑑅 𑑋