𑐮𑐸𑐩𑑄𑐎𑐾𑐩𑐵𑑅𑐩𑑂𑐴 𑐳𑐵𑐴𑐶𑐟𑑂𑐫𑐎𑐵𑐬 𑐩𑑀𑐟𑐶𑐮𑐎𑑂𑐲𑑂𑐩𑐷 𑐄𑐥𑐵𑐳𑐶𑐎𑐵

– 𑐳𑐸𑐐𑐟𑐬𑐟𑑂𑐣 𑐳𑐶𑐣𑑂𑐡𑐸𑐬𑐵𑐎𑐵𑐬 (𑐥𑐟𑑂𑐬𑐎𑐵𑐬)

𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐏𑑂𑐫𑐮𑐫𑑂 𑐮𑑀𑐎𑑄𑐴𑑂𑐰𑐵𑑅𑐩𑑂𑐴 𑐳𑐵𑐴𑐶𑐟𑑂𑐫𑐎𑐵𑐬 𑐩𑐡𑐸𑐩𑑂𑐴 𑐩𑑀𑐟𑐷𑐮𑐎𑑂𑐲𑑂𑐩𑐷 𑐄𑐥𑐵𑐳𑐶𑐎𑐵 𑐟𑐸𑐮𑐵𑐢𑐬𑐫𑐵 𑑑𑑑𑑓 𑐎𑑂𑐰𑑅𑐐𑐸 𑐖𑐣𑑂𑐩 𑐡𑐶𑐰𑐳 𑐠𑑁𑑄 𑑒𑑐𑑗𑑙 𑐳𑐵𑐮 𑐀𑐳𑐵𑐬 𑑒𑑘 𑐐𑐟𑐾 𑐩𑑄𑐐𑐮𑐰𑐵𑑅𑐫𑐵 𑐣𑑂𑐴𑐶 𑐮𑐵𑑅𑐐𑐸 𑐡𑐸 𑑋

𑐠𑑅𑐐𑐸 𑐖𑐷𑐰𑐣𑐎𑐵𑐮𑐫𑑂 𑐰𑐫𑐎𑐮𑑄 𑐣𑐾𑐥𑐵𑐮𑐨𑐵𑐲𑐵 𑐰 𑐳𑐵𑐴𑐶𑐟𑑂𑐫𑐫𑐵𑐟 𑐠𑐎𑐵𑐫𑐾𑐟 𑐰𑐫𑐎𑐮𑑄 𑐠𑑅𑐐𑐸 𑐎𑐛𑑀𑐬 𑐎𑐸𑐟𑐮𑑄 𑐁𑐥𑐵𑐮𑑄 𑐳𑐵𑐴𑐶𑐟𑑂𑐫 𑐳𑐶𑐬𑑂𑐖𑐣𑐵 𑐫𑐵𑐣𑐵𑑅 𑐟𑑂𑐰𑑅𑐟𑐵𑑅 𑐠𑐎𑐹𑐐𑐸 𑐡𑐸 𑑋 𑐰𑐫𑐎𑑅𑐫𑐵 𑐠𑐸𑐎𑐠𑑄𑐫𑐵 𑐐𑐸𑐞𑐫𑐵𑐟 𑐗𑐷𑐳𑑄 𑐣𑑂𑐴𑑂𑐫𑐵𑐰𑐮𑐾𑑄 𑐮𑐸𑐩𑑄𑐎𑐾𑐩𑐵𑑅𑐐𑐸 𑐏𑐣𑐾𑐡𑐸 𑑋 𑐣𑐵𑐥𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵𑐟 𑐠𑐎𑐫𑐵𑑅 𑐰𑐣𑐾𑐟 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫𑐫𑐵 𑐀𑐢𑑂𑐫𑐫𑐣 𑐣𑑄 𑐫𑐵𑐣𑐵𑑅 𑐰𑐣𑐾𑐩𑐵𑑅𑐐𑐸 𑐡𑐸 𑑋

𑐳𑐵𑐴𑐶𑐟𑑂𑐫𑐎𑐵𑐬 𑐩𑑀𑐟𑐶𑐮𑐎𑑂𑐲𑑂𑐩𑐷 𑐄𑐥𑐵𑐳𑐶𑐎𑐵𑐫𑐵 𑐖𑐣𑑂𑐩 𑐣𑐾𑐥𑐵𑐮 𑐳𑐩𑑂𑐰𑐟 𑑑𑑐𑑒𑑙 𑐡𑐶𑐮𑑂𑐮𑐵𑐠𑑂𑐰 𑐡𑑂𑐰𑐵𑐡𑐳𑐶𑐫𑐵 𑐡𑐶𑐣𑐫𑑂 𑐣𑑂𑐫𑐟𑐫𑐵 𑐟𑐸𑑄𑐕𑐾𑑃 𑐐𑐮𑑂𑐮𑐷𑐂 𑐖𑐹𑐐𑐸 𑐏𑑅 𑑋 𑐰𑐫𑐎𑑅𑐫𑐵 𑐧𑑁 𑐳𑐵𑐴𑐸 𑐡𑑂𑐬𑐰𑑂𑐫𑐢𑐬 𑐟𑐸𑐮𑐵𑐢𑐬 𑐏𑑅𑐳𑐵 𑐰𑐫𑐎𑑅𑐫𑐵 𑐩𑐵𑑄 𑐖𑑂𑐘𑐵𑐣𑐮𑐎𑑂𑐲𑑂𑐩𑐷 𑐟𑐸𑐮𑐵𑐢𑐬 𑐏𑑅 𑑋 𑐰𑐫𑐎𑐮𑑄 𑐱𑐶𑐎𑑂𑐲𑐵 𑐁𑐬𑑂𑐖𑐣𑐫𑐵 𑐗𑑂𑐰𑐮𑐫𑑂 𑐣𑐾𑐥𑐵𑐮 𑐳𑐩𑑂𑐰𑐟 𑑑𑑐𑑓𑑔 𑐥𑐘𑑂𑐔𑐩𑐶𑐫𑐵 𑐡𑐶𑐣𑐫𑑂 𑐣𑑂𑐴𑑂𑐫𑐵𑐎𑐵𑐮𑐶 𑐳𑑄𑐳𑑂𑐎𑐺𑐟, 𑐥𑐵𑐮𑐷 𑐳𑐵𑐴𑐶𑐟𑑂𑐫𑐫𑑂 𑐰𑐶𑐱𑐾𑐲 𑐀𑐢𑑂𑐫𑐫𑐣 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐰𑐫𑐎𑐮𑑄 𑐰𑐶.𑐳𑑄 𑑑𑑙𑑙𑑐 𑐣𑐶𑐳𑐾𑑄 𑐰𑐶.𑐳𑐶𑑄 𑑑𑑙𑑙𑑒 𑐳𑐵𑐮𑐫𑑂 𑐱𑐵𑐬𑐡𑐵 𑐥𑐟𑑂𑐬𑐶𑐎𑐵𑐫𑑂 𑐣𑐾𑐥𑐵𑐮𑐷𑐨𑐵𑐲𑐵𑑄 𑐧𑐵𑐏𑑄𑐟 𑐥𑐶𑐠𑐣𑐵𑐡𑐷𑐐𑐸 𑐏𑑅 𑑋 𑐠𑐸𑐎𑐠𑑄 𑐴𑐾 𑐰𑐫𑐎𑑅𑐫𑐵 𑐳𑐵𑐴𑐶𑐟𑑂𑐫 𑐳𑐾𑐰𑐵𑐫𑐵 𑐏𑑃 𑐮𑑂𑐴𑐵𑐣𑐵 𑐰𑐣𑐾𑐧𑐮𑐫𑑂 𑐣𑐾𑐥𑐵𑐮 𑐳𑐩𑑂𑐰𑐟 𑑑𑑐𑑖𑑕 𑐳𑐵𑐮𑐫𑑂 𑐢𑐬𑑂𑐩𑐡𑐹𑐟 𑐥𑐟𑑂𑐬𑐶𑐎𑐵𑐫𑑂 𑐣𑐾𑐥𑐵𑐮𑐨𑐵𑐲𑐵𑑄 𑐧𑐵𑐏𑑄 𑐥𑐶𑐠𑐣𑐵𑐡𑐷𑐐𑐸 𑐏𑑅 𑑋 𑐳𑐵𑐴𑐶𑐟𑑂𑐫𑐫𑐵 𑐥𑑂𑐬𑐔𑐵𑐬 𑐥𑑂𑐬𑐔𑐵𑐬 𑐫𑐵𑐫𑐐𑐸 𑐗𑑂𑐰𑐮𑐫𑑂 𑐰𑐫𑐎𑐮𑑄 𑐠𑐷𑐠𑐷 𑐁𑐥𑐵𑐮𑑄 𑐥𑐟𑑂𑐬𑐶𑐥𑐟𑑂𑐬𑐶𑐎𑐵𑐫𑑂 𑐣𑑄 𑐧𑐵𑐏𑑄, 𑐣𑐶𑐰𑐣𑑂𑐢, 𑐥𑑂𑐬𑐰𑐣𑑂𑐢 𑐎𑐰𑐶𑐟 𑐮𑐐𑐵𑐫𑐟 𑐔𑑂𑐰𑐫𑐵𑑅 𑐥𑐶𑐠𑐣𑐵𑐡𑐷𑐐𑐸 𑐏𑑅 𑑋

𑐰𑐫𑐎𑐮𑑄 𑐣𑐾𑐥𑐵𑐮𑐨𑐵𑐲𑐵 𑐥𑐬𑐶𑐲𑐡𑐫𑑂 𑐣𑐾.𑐳𑑄. 𑑑𑑐𑑗𑑑 𑐳𑐵𑐮𑑄𑐣𑐶𑐳𑐾𑑄 𑐴𑐾 𑐁𑐖𑐶𑐰𑐣 𑐳𑐾𑐰𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐰𑐫𑐎𑐮𑑄 𑐠𑐸𑐐𑐸 𑐳𑑄𑐳𑑂𑐠𑐵𑐫𑑂 𑐎𑑀𑐲𑐵𑐢𑑂𑐫𑐎𑑂𑐲 𑐥𑐡𑐫𑑂 𑐔𑑂𑐰𑐣𑐵 𑐳𑐾𑐰𑐵𑐫𑐵 𑐨𑐵𑐰 𑐧𑑂𑐰𑐮𑑄𑐎𑐵 𑐳𑐾𑐰𑐵 𑐫𑐵𑐣𑐵𑐡𑐷𑐐𑐸 𑐏𑑅𑐳𑐵 𑐠𑐸𑐐𑐸 𑐳𑑄𑐳𑑂𑐠𑐵𑐥𑐵𑐏𑐾𑑄 𑐥𑐶𑐠𑑄𑐐𑐸 𑐣𑐾𑐥𑐵𑐮 𑐆𑐟𑐸𑐥𑑁𑐫𑐵 𑐡𑐸𑐐𑑅 𑐎𑑂𑐰𑑃𑐫𑑂 𑐴𑐾𑑄 𑐴𑐾 𑐰𑐫𑐎𑑅 𑐖𑐸𑐫𑐵𑐡𑐷𑐐𑐸 𑐣𑑄 𑐡𑐷𑐐𑐸 𑐏𑑅 𑑋 𑐰𑐫𑐎𑑅 𑐣𑐾𑐥𑐵𑐮𑐨𑐵𑐲𑐵 𑐩𑐶𑐳𑐵 𑐏𑐮𑑅𑐫𑐵 𑐣𑑂𑐴𑐵𑐥𑐵𑑄𑐩𑑂𑐴 𑐣𑐎𑐶𑑄 𑐖𑐸𑐫𑐵𑐡𑐷𑐐𑐸 𑐏𑑅𑐳𑐵 𑐣𑐾𑐥𑐵𑐮𑐨𑐵𑐲𑐵 𑐊𑐎𑐾𑐡𑐩𑐶𑐫𑐵 𑐡𑐸𑐖𑑅𑐟𑐎𑑄 𑐖𑐸𑐫𑐵 𑐨𑐵𑐲𑐵 𑐳𑐾𑐰𑐵 𑐫𑐵𑐣𑐵𑐡𑐷𑐐𑐸 𑐡𑐸 𑑋

𑐣𑐾𑐥𑐵𑐮𑐨𑐵𑐲𑐵𑐫𑐵 𑐳𑐵𑐴𑐶𑐟𑑂𑐫𑐥𑑂𑐬𑐟𑐶 𑐰𑐫𑐎𑐮𑑄 𑐫𑐵𑐣𑐵𑐡𑐷𑐐𑐸 𑐫𑑀𑐐𑐡𑐵𑐣𑐫𑐵𑐟 𑐡𑐸𑐰𑐵𑐮𑐵 𑐰𑐣𑐾𑐧𑐮𑐫𑑂 𑐰𑐫𑐎𑑅 𑐕𑐩𑑂𑐴 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐏𑑂𑐫𑑅𑐫𑐵 𑐰𑐶𑐡𑐸𑐲𑐷 𑐧𑑁𑐡𑑂𑐢 𑐄𑐥𑐵𑐳𑐶𑐎 𑐖𑐸𑐫𑐵𑐡𑐷𑐐𑐸 𑐏𑐣𑐾𑐡𑐸 𑑋

𑐰𑐫𑐎𑐮𑑄 𑐠𑑅𑐩𑑂𑐴𑑄 𑐬𑐔𑐣𑐵 𑐫𑐵𑐣𑐵𑐡𑐷𑐐𑐸 𑐁𑐥𑐵𑐮𑑄 𑐎𑐺𑐟𑐶𑐟 𑐳𑐦𑐹𑐫𑐵 𑐬𑐸𑐥𑐫𑑂 𑐥𑐶𑐡𑐣𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐫𑐎𑑅𑐫𑐵 𑐎𑐺𑐟𑐶𑐫𑐵 𑐣𑐵𑑄 𑐎𑐫𑐵 𑐰𑐣𑐾𑐧𑐮𑐫𑑂 𑐩𑑀𑐟𑐶𑐩𑐵 (𑐣𑐶𑐰𑐣𑑂𑐢 𑐩𑐸𑐣𑐵) 𑐳𑑄𑐑 𑐥𑑂𑐬𑐰𑐣𑑂𑐢, 𑐔𑐏𑐸𑑄𑐔𑐶𑐫𑐵 𑐳𑐬𑑂𑐰𑐫𑑂 (𑐔𑐶𑐣𑐵𑐏𑑄 𑐩𑐸𑐣𑐵), 𑐩𑑀𑐟𑐶 𑐧𑐵𑐏𑑄 𑐥𑐸𑐔𑑅 (𑐧𑐵𑐏𑑄 𑐥𑐸𑐔𑑅), 𑐄𑐟𑑂𑐥𑐮𑐰𑐬𑑂𑐞𑐵 ( 𑐧𑐸𑐡𑑂𑐢𑐎𑐵𑐮𑐷𑐣 𑐱𑑂𑐬𑐵𑐰𑐶𑐎𑐵𑐫𑐵 𑐖𑐷𑐰𑐣𑐷), 𑐢𑑁𑐧𑐖𑐶 (𑐣𑐶𑐧𑐣𑑂𑐢) 𑐮𑐐𑐵𑐫𑐟 𑐗𑐷𑐐𑐸 𑐣𑑂𑐴𑑂𑐫𑑀𑐣𑐾 𑐳𑐡𑐵𑑄 𑐡𑐫𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐰𑐫𑐎𑐮𑑄 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑑂𑐬𑐶𑐟𑑂𑐫 𑐔𑑂𑐰𑐣𑑂𑐴𑑂𑐫𑐵𑐎𑐾𑐟 𑐫𑐵𑐣𑐵𑐡𑐷𑐐𑐸 𑐫𑑀𑐐𑐡𑐵𑐣𑐫𑐵𑐟 𑐎𑐡𑐬 𑐫𑐵𑐣𑐵 𑐰𑐫𑐎𑑅𑐫𑐵𑐟 𑐠𑐷𑐠𑐷 𑐳𑑄𑐑 𑐳𑑄𑐳𑑂𑐠𑐵𑐥𑐵𑐏𑐾𑑄 𑐠𑐷𑐠𑐷 𑐳𑐶𑐬𑐥𑐵𑑅 𑐰 𑐴𑐣𑐾𑐖𑑂𑐫𑐵 𑐣𑑄 𑐫𑐵𑑅𑐐𑐸 𑐡𑐸 𑑋 𑐠𑐸𑐎𑐠𑑄 𑐰𑐫𑐎𑐮𑑄 𑐳𑐵𑐴𑐶𑐟𑑂𑐫 𑐏𑑂𑐫𑐮𑐫𑑂 𑐫𑐵𑐣𑐵𑐡𑐷𑐐𑐸 𑐫𑑀𑐐𑐡𑐵𑐣𑐫𑐵𑐟 𑐎𑐡𑐬 𑐫𑐵𑐣𑐵 𑐩𑑀𑐟𑐶𑐮𑐎𑑂𑐲𑑂𑐩𑐷 𑐀𑐨𑐶𑐣𑐣𑑂𑐡𑐣 𑐳𑐩𑐵𑐬𑑀𑐴 𑐳𑐩𑐶𑐟𑐶𑐥𑐵𑐏𑐾𑑄 𑐰𑐫𑐎𑑅 𑑘𑑐 𑐡𑑃𑐫𑐵 𑐧𑐸𑐡𑐶𑑄𑐫𑐵 𑐮𑐳𑐟𑐵𑐫𑑂 𑐟𑑅𑐖𑐶𑐎 𑐀𑐨𑐶𑐣𑐣𑑂𑐡𑐣 𑐫𑐵𑑅𑐐𑐸 𑐏𑑅 𑑋 𑐐𑐸𑐐𑐸 𑐖𑑂𑐫𑐵 𑐣𑐾𑐥𑐵𑐮𑐨𑐵𑐲𑐵 𑐏𑑂𑐫𑐮𑐫𑑂 𑐔𑑂𑐰𑐕𑐵𑐫𑐾𑐧𑐴𑑅 𑐖𑐹𑐐𑐸 𑐖𑑂𑐫𑐵 𑐖𑐸𑐫𑐵 𑐠𑑁𑑄 𑐗𑐷𑐐𑐸 𑐣𑑂𑐴𑑂𑐫𑑀𑐣𑐾 𑐡𑑄 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋

𑐰𑐶.𑐳. 𑑒𑑐𑑔𑑘 𑐳𑐵𑐮𑐫𑑂 𑐰𑐫𑐎𑑅𑐫𑐵𑐟 𑐣𑐾𑐥𑐵𑐮 𑐣𑐵𑐬𑐷 𑐳𑐵𑐴𑐶𑐟𑑂𑐫 𑐳𑐾𑐰𑐵 𑐎𑐾𑐣𑑂𑐡𑑂𑐬𑐥𑐵𑐏𑐾𑑄 𑐀𑐨𑐶𑐣𑐣𑑂𑐡𑐣 𑐫𑐵𑑅𑐐𑐸 𑐡𑐸 𑑋 𑐠𑐸𑐎𑐠𑑄 𑐴𑐾 𑐳𑐵𑐴𑐶𑐟𑑂𑐫𑐶𑐎 𑐥𑐟𑑂𑐬𑐎𑐵𑐬 𑐳𑑄𑐑𑐥𑐵𑐏𑐾𑑄 𑐮𑑀𑐎𑐥𑑂𑐬𑐶𑐫𑐵𑐡𑐾𑐰𑐷 𑐳𑐶𑐬𑐥𑐵𑑅 𑐰𑐶.𑐳. 𑑒𑑐𑑔𑑙 𑐳𑐵𑐣𑐮𑐫𑑂 𑐡𑐾𑐕𑐵𑐫𑐾𑐐𑐸 𑐖𑑂𑐫𑐵 𑐫𑐵𑑅𑐐𑐸 𑐡𑐸 𑑋 𑐀𑐠𑐾𑐴𑐾 𑐰𑐫𑐎𑑅𑐫𑐵𑐫𑐵𑐟 𑐩𑐾𑐩𑐾𑐐𑐸 𑐠𑐷𑐠𑐷 𑐏𑑂𑐫𑐮𑑄 𑐣𑑄 𑐰𑐫𑐎𑑅𑐫𑐵 𑐫𑑀𑐐𑐡𑐵𑐣𑐫𑐵𑐟 𑐎𑐡𑐬 𑐫𑐵𑐣𑐵 𑐴𑐣𑐵𑐰𑐣𑐵 𑐫𑐵𑑅𑐐𑐸 𑐡𑐸𑐺 𑑋

𑐰𑐫𑐎𑑅𑐫𑐵 𑐧𑐸𑐡𑐶𑑄𑐫𑐵 𑐮𑐳𑐟𑐵𑐫𑑂 𑐒𑐟 𑐟𑐸𑐮𑐵𑐢𑐬 𑐳𑐩𑐶𑐟𑐶 𑐩𑐶𑐳𑐵 𑐥𑐸𑐔𑑅𑐥𑐵𑐏𑐾𑑄 𑐡𑑃𑐫𑑂𑐡𑐳𑑃 𑐴𑐾 𑐴𑐶𑐡𑐵𑐣 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐵 𑐰𑐫𑐎𑑅𑐫𑐵 𑐫𑑀𑐐𑐡𑐵𑐣𑐫𑐵𑐟 𑐮𑐸𑐩𑑄𑐎𑐾𑐐𑐸 𑐖𑑂𑐫𑐵 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐠𑐾𑐴𑐾 𑐰𑐫𑐎𑑅𑐫𑐵 𑐧𑐸𑐡𑐶𑑄𑐫𑐵 𑐗𑑂𑐰𑐮𑐫𑑂 𑐣𑐾𑐥𑐵𑐮𑐨𑐵𑐲𑐵 𑐩𑐶𑐳𑐵 𑐏𑐮𑑅𑐥𑐵𑐏𑐾𑑄 𑐣𑑄 𑐖𑑂𑐫𑐵𑐗𑑂𑐰𑑅 𑐣𑑂𑐴𑑂𑐫𑐵𑐎𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐰𑐫𑐎𑐮𑑄 𑐣𑐾𑐥𑐵𑐮𑐨𑐵𑐲𑐵𑐫𑐵 𑐩𑐵𑐢𑑂𑐫𑐩𑑄 𑐧𑑂𑐰𑐣𑐾𑐐𑐸 𑐫𑐵𑐣𑐵 𑐰𑐫𑐵𑐔𑑂𑐰𑑄𑐐𑐸 𑐮𑐏𑐟𑐷𑐬𑑂𑐠𑐫𑐵 𑐖𑐐𑐟 𑐳𑐸𑐣𑑂𑐡𑐬 𑐧𑑂𑐰𑐣𑐾𑐎𑐸𑐠𑐶𑐫𑐵 𑐨𑐰𑐣 𑐡𑐫𑐎𑐾𑐟 𑐱𑐶𑐮𑐵𑐣𑑂𑐫𑐵𑐳 𑐣𑑄 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐰𑐫𑐎𑑅𑐫𑐵 𑐠𑐸𑐮𑐶𑐩𑐕𑐶 𑐫𑑀𑐐𑐡𑐵𑐣𑐫𑐵𑐟 𑐠𑑁𑑄𑐫𑐵𑐥𑐶𑐣𑑂𑐳𑑄 𑐧𑐵𑑄𑐮𑐵𑐎 𑐰𑐵𑑅𑐔𑐵𑐫𑐾𑐎𑐵 𑐰𑐣𑐾𑐐𑐸 𑐖𑑂𑐫𑐵 𑐩𑑂𑐴𑑀 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐣𑑂𑐴𑐹𑐥𑐸𑐳𑑂𑐟𑐵𑐥𑐶𑐣𑑂𑐳𑑄 𑐳𑐵𑐴𑐶𑐟𑑂𑐫𑐎𑐵𑐬 𑐩𑑀𑐟𑐶𑐮𑐎𑑂𑐲𑑂𑐩𑐷 𑐄𑐥𑐵𑐳𑐶𑐎𑐵𑐫𑐵𑐟 𑐮𑑀𑐩𑑄𑐎𑐵𑑅 𑐰𑐣𑐵𑐔𑑂𑐰𑑄𑐐𑐸 𑐏𑐣𑐾𑐡𑐸 𑑋 𑐄𑐎𑐶𑑄 𑐣𑐾𑐥𑐵𑐮𑐨𑐵𑐲𑐵 𑐏𑑂𑐫𑑅 𑐰 𑐳𑐵𑐴𑐶𑐟𑑂𑐫𑐎𑐵𑐬𑐥𑐶𑑄 𑐮𑐐𑐵𑐫𑐟 𑐰𑐶𑐱𑐾𑐲 𑐫𑐵𑐣𑐵 𑐄𑐡𑐵𑐫𑑂𑐟𑐳𑐾𑑄 𑐩𑑀𑐟𑐶𑐮𑐎𑑂𑐲𑑂𑐩𑐷𑐫𑐵𑐟 𑐮𑐸𑐩𑑄𑐎𑐵𑑅 𑐰𑐫𑐎𑑅𑐫𑐵 𑐫𑑀𑐐𑐡𑐵𑐣𑐫𑐵𑐟 𑐀𑐗 𑐔𑑂𑐰𑐣𑑂𑐴𑑂𑐫𑐵𑐎𑐾𑐟 𑐐𑐸𑐎𑐠𑑄𑐫𑐵 𑐖𑑂𑐫𑐵 𑐫𑐵𑐣𑐵 𑐰𑐣𑐾𑐦𑐂𑐐𑐸 𑐏𑑅 𑐄𑐎𑐠𑑄 𑐫𑐵𑐣𑐵 𑐰𑐣𑐾𑐐𑐸 𑐎𑐸𑐟𑑅 𑐖𑐵𑐬𑐷 𑐖𑐸𑐫𑐵𑐔𑑂𑐰𑐣𑐾𑐩𑐵𑑅𑐐𑐸 𑐡𑐸 𑑋