𑐰𑐖𑑂𑐬𑐵𑐔𑐵𑐬𑑂𑐫 𑐀𑐢𑑂𑐫𑐫𑐣 𑐩𑐞𑑂𑐜𑐮𑐫𑐵 𑑔𑑕 𑐡𑑃 𑐧𑐸𑐡𑐶𑑄 𑐴𑐣

𑐰𑐖𑑂𑐬𑐵𑐔𑐵𑐬𑑂𑐫 𑐀𑐢𑑂𑐫𑐫𑐣 𑐩𑐞𑑂𑐜𑐮𑐫𑐵 𑑔𑑕 𑐎𑑂𑐰𑑅𑐐𑐸 𑐧𑐸𑐡𑐶𑑄 𑐩𑑂𑐴𑐶𑐐𑑅 𑐕𑐐𑐹 𑐖𑑂𑐫𑐵𑐗𑑂𑐰𑑅𑐫𑐵𑐳𑐾𑑄 𑐴𑐣 𑑋 𑐀𑐟𑐶 𑐥𑐸𑐖𑐣𑐷𑐫 𑐩𑐴𑐵𑐐𑐸𑐬𑐸 𑐥𑑄. 𑐧𑐡𑑂𑐬𑐷𑐬𑐟𑑂𑐣 𑐰𑐖𑑂𑐬𑐵𑐔𑐵𑐬𑑂𑐫𑑄 𑐣𑐷𑐳𑑂𑐰𑐣𑐵 𑐧𑐶𑐖𑑂𑐫𑐵𑑅𑐐𑐸 𑐀𑐢𑑂𑐫𑐫𑐣 𑐩𑐞𑑂𑐜𑐮𑐫𑐵 𑐥𑐷𑐣𑑂𑐫𑐵𑐡𑑃 𑐧𑐸𑐡𑐶𑑄 𑐀𑐢𑑂𑐫𑐫𑐣 𑐩𑐞𑑂𑐜𑐮𑐫𑐵 𑐥𑐡𑐵𑐢𑐶𑐎𑐵𑐬𑐷 𑐰 𑐰𑐳𑐥𑑀𑐮𑐫𑐵 𑐄𑐟𑑂𑐟𑐬𑐵𑐢𑐶𑐎𑐵𑐬𑐷 𑐱𑐶𑐲𑑂𑐫𑐥𑐶𑑄𑐥𑐵𑐏𑐾𑑄 𑐰𑐳𑐥𑑀𑐮𑐫𑐵 𑐎𑐶𑐥𑐵𑐫𑑂 𑐳𑑂𑐰𑐵𑑄 𑐡𑐾𑐕𑐵𑐳𑐾 𑐟𑑂𑐰𑐵𑑅𑐡𑐾𑐰𑐵𑐫𑑂 𑐩𑐟 𑐔𑑂𑐫𑐵𑐎𑐵𑑅 𑐖𑑂𑐫𑐵𑐗𑑂𑐰𑑅 𑐄𑐮𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋

𑐀𑐢𑑂𑐫𑐫𑐣 𑐩𑐞𑑂𑐜𑐮𑐫𑐵 𑐣𑐵𑐫𑑅 𑐎𑐬𑑂𑐞𑐾𑐮 𑐃. 𑐳𑐵𑐣𑐸𑐬𑐵𑐖𑐵 𑐰𑐖𑑂𑐬𑐵𑐔𑐵𑐬𑑂𑐫𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐰𑐳𑐥𑑀𑐮 𑐥𑑄. 𑐧𑐡𑑂𑐬𑐷𑐬𑐟𑑂𑐣 𑐐𑐸𑐬𑐸𑐖𑐸𑐫𑐵 𑐱𑐶𑐲𑑂𑐫𑐮𑐶𑐳𑐾𑑄 𑐄𑐟𑑂𑐟𑐬𑐵𑐢𑐶𑐎𑐵𑐬𑐷𑐎𑐠𑑄 𑐎𑐫𑐵𑐟𑑅𑐩𑑂𑐴 𑐥𑑂𑐬𑐵. 𑐜𑐵. 𑐣𑐬𑐾𑐱𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫𑑄𑐫𑐵 𑐥𑑂𑐬𑐩𑐸𑐏 𑐁𑐟𑐶𑐠𑑂𑐫𑐟𑐵𑐫𑑂 𑐖𑐹𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫 𑐰𑐶𑐱𑐾𑐲 𑐥𑐵𑐴𑐵𑑄𑐎𑐠𑑄 𑐫𑐾𑑃 𑐡𑐾𑐫𑑂𑐫𑐵 𑐗𑐶𑑄𑐔𑑂𑐫𑐵𑐐𑐹 𑐰𑐶𑐴𑐵𑐬𑐫𑐵 𑐡𑐾𑐫𑑂 𑐠𑐵𑐫𑑂𑐥𑐵 𑐩𑐹𑐮 𑐔𑐎𑑂𑐬𑐾𑐱𑑂𑐰𑐬 𑐩𑑀𑐴𑐣𑐬𑐟𑑂𑐣 𑐰𑐖𑑂𑐬𑐵𑐔𑐵𑐬𑑂𑐫 𑐗𑐵𑐫𑐵𑐡𑐷𑐐𑐸 𑐏𑑅 𑑋 𑐩𑐹𑐥𑐵𑐴𑐵𑑄 𑐥𑑂𑐬𑐵. 𑐜𑐵. 𑐰𑐖𑑂𑐬𑐵𑐔𑐵𑐬𑑂𑐫𑐥𑐵𑐏𑐾𑑄 𑐟𑑂𑐬𑐶𑐬𑐟𑑂𑐣 𑐱𑐬𑐞 𑐐𑐩𑐣 𑐫𑐵𑐣𑐵𑐧𑐶𑐖𑑂𑐫𑐵𑐳𑐾𑑄 𑐣𑑂𑐴𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐀𑐢𑑂𑐫𑐫𑐣 𑐩𑐞𑑂𑐜𑐮𑐫𑐵 𑐕𑑂𑐫𑐵𑐘𑑂𑐖𑐾 𑐢𑐣𑐎𑐵𑐖𑐷 𑐰𑐖𑑂𑐬𑐵𑐔𑐵𑐬𑑂𑐫 𑐮𑐳𑐎𑐸𑐳 𑐫𑐵𑐣𑐵𑐡𑐷𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐮𑐸𑐩𑑂𑐧𑐶𑐣𑐷 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫𑐫𑐵 𑐥𑐸𑐮𑐵𑑄𑐩𑑂𑐴 𑐄𑐥𑐎𑐸𑐮𑐥𑐟𑐶 𑐥𑑂𑐬𑐵.𑐜𑐵. 𑐴𑐺𑐡𑐫𑐬𑐟𑑂𑐣 𑐰𑐖𑑂𑐬𑐵𑐔𑐵𑐬𑑂𑐫, 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬, 𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐳𑐴 𑐥𑑂𑐬𑐵. 𑐬𑐵𑐖𑐣𑐮𑐵𑐮 𑐖𑑀𑐱𑐷, 𑐰𑐳𑐥𑑀𑐮 𑐧𑐡𑑂𑐬𑐷 𑐐𑐸𑐬𑐸𑐖𑐸𑐫𑐵 𑐱𑐶𑐲𑑂𑐫𑐵 𑐥𑑂𑐬𑐵. 𑐜𑐵. 𑐰𑐖𑑂𑐬𑐵𑐔𑐵𑐬𑑂𑐫𑑄 𑐣𑐾𑐰𑐵𑑅 𑐧𑑁𑐡𑑂𑐢 𑐢𑐬𑑂𑐩, 𑐐𑐸𑐬𑐸𑐖𑐸𑐥𑐶𑑄𑐟 𑐟𑐟𑑂𑐎𑐵𑐮𑐷𑐣 𑐂𑐮𑐫𑑂 𑐬𑐵𑐖𑑂𑐫𑐥𑐵𑐏𑐾𑑄 𑐖𑐹𑐐𑐸 𑐄𑐟𑑂𑐥𑐷𑐜𑐣𑐮𑐶𑐳𑐾𑑄 𑐄𑐎𑐶𑐫𑐵 𑐰𑐶𑐬𑐸𑐡𑑂𑐢 𑐥𑑄. 𑐰𑐖𑑂𑐬𑐵𑐔𑐵𑐬𑑂𑐫𑑄 𑐫𑐵𑐣𑐵𑐧𑐶𑐖𑑂𑐫𑐵𑑅𑐐𑐸 𑐳𑑄𑐑𑐬𑑂𑐲𑐫𑐵 𑐠𑐷𑐠𑐷 𑐥𑐎𑑂𑐲𑐫𑐵𑐟 𑐎𑐫𑐵𑑅 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋
𑐡𑐾𑐫𑑂 𑐡𑐧𑐹𑐫𑐵 𑐳𑑄𑐬𑐎𑑂𑐲𑐎 𑐮𑐶𑐳𑐾𑑄 𑐣𑐾𑐰𑐵𑑅 𑐣𑑂𑐴𑑂𑐫𑐮𑐸𑐰𑐵 𑐩𑐮𑑂𑐮 𑐎𑐾. 𑐳𑐸𑐣𑑂𑐡𑐬𑑄 𑐠𑑁𑑄𑐫𑐵 𑐂𑐮𑐫𑑂 𑐰𑐖𑑂𑐬𑐵𑐔𑐵𑐬𑑂𑐫𑐟 𑐎𑐬𑑂𑐩𑐎𑐵𑐞𑑂𑐜𑐫𑑂 𑐖𑐎 𑐳𑐷𑐩𑐶𑐟 𑐖𑐸𑐂 𑐩𑐖𑐶𑐄 𑐢𑐵𑐳𑐾𑑄 𑐁𑑅 𑐠𑐸𑐎𑐷 𑐴𑐾 𑐖𑐎 𑐮𑐶𑐎𑐸𑐣𑐵𑐔𑑂𑐰𑐣𑐾𑐐𑐸 𑐃 𑐣𑑄 𑐩𑐏𑐸 𑐢𑐫𑐵𑐡𑐶𑐮 𑑋

𑐣𑐾𑐥𑐵𑐮𑐨𑐵𑐲𑐵 𑐎𑐾𑐣𑑂𑐡𑑂𑐬𑐷𑐫 𑐰𑐶𑐨𑐵𑐐𑐫𑐵 𑐥𑑂𑐬𑐩𑐸𑐏 𑐳𑐴 𑐥𑑂𑐬𑐵 .𑐜𑐵. 𑐬𑐵𑐖𑐣𑐮𑐵𑐮 𑐖𑑀𑐱𑐷𑑄 𑐰𑐖𑑂𑐬𑐵𑐔𑐵𑐬𑑂𑐫 𑐳𑐩𑐸𑐡𑐵𑐫 𑐳𑑂𑐰𑐫𑐩 𑐕𑐐𑐹 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 𑐏𑑅 𑐢𑐵𑐳𑐾𑑄 𑐠𑐸𑐐𑐸 𑐳𑐩𑐸𑐡𑐵𑐫𑐵𑐟 𑐣𑑂𑐴𑑂𑐫𑐵𑐎𑐾𑐟 𑐖𑑂𑐰𑑅𑐩𑐡𑐸𑐐𑐸 𑐫𑑀𑐐𑐡𑐵𑐣 𑐧𑐶𑐫𑐵𑐡𑐷𑐥𑐶𑑄 𑐀𑐟𑐶𑐎𑑄 𑐣𑐵𑑄𑐖𑐵𑑅𑐥𑐶𑑄 𑐳𑐸𑐬𑐟 𑐰𑐖𑑂𑐬, 𑐮𑐶𑐮𑐵 𑐰𑐖𑑂𑐬 𑐠𑐾𑑄𑐖𑑂𑐫𑐵𑑅𑐥𑐶𑑄 𑐖𑐎 𑐩𑐏𑐸 𑐳𑑂𑐰𑐫𑐩 𑐥𑑄. 𑐧𑐡𑑂𑐬𑐷 𑐐𑐸𑐬𑐸𑐖𑐸 𑐠𑐾𑑄𑐖𑑂𑐫𑐵𑑅𑐥𑐶𑐣𑐶𑐐𑐸 𑐟𑐎𑑄 𑐕𑐸𑑄 𑐴𑐾 𑐀𑐨𑐶𑐮𑐾𑐏𑐷𑐎𑐬𑐞 𑐫𑐵𑐫𑐾 𑐩𑐦𑐸𑐐𑐸 𑐰𑐶𑐜𑐩𑑂𑐧𑐣𑐵 𑐏𑑅 𑐢𑐫𑐵𑐡𑐶𑐮 𑑋

𑐩𑐹𑐥𑐵𑐴𑐵𑑄 𑐥𑑂𑐬𑐵. 𑐜𑐵. 𑐰𑐖𑑂𑐬𑐵𑐔𑐵𑐬𑑂𑐫𑑄 𑐀𑐢𑑂𑐫𑐫𑐣 𑐩𑐞𑑂𑐜𑐮𑐫𑐵 𑐣𑐷𑐳𑑂𑐰𑐣𑐵𑐫𑐵 𑐂𑐟𑐶𑐴𑐵𑐳 𑐎𑐣𑐵𑐡𑐶𑐳𑐾𑑄 𑐥𑑄. 𑐧𑐡𑑂𑐬𑐷𑐬𑐟𑑂𑐣 𑐰𑐖𑑂𑐬𑐵𑐔𑐵𑐬𑑂𑐫𑑄 𑐀𑐢𑑂𑐫𑐫𑐣 𑐩𑐞𑑂𑐜𑐮 𑐣𑐷𑐳𑑂𑐰𑐣𑐾𑐐𑐸 𑐖𑐎 𑐩𑐏𑐸 𑐄𑐎𑐶𑐫𑐵𑐟 𑐎𑑂𑐬𑐶𑐫𑐵𑐱𑐷𑐮 𑐫𑐵𑐣𑐵 𑐟𑐫𑐾𑐐𑐸 𑐣𑐶𑑄𑐟𑐶𑑄 𑐫𑐵𑐣𑐵𑐡𑐷𑐐𑐸 𑐳𑑄𑐑𑐬𑑂𑐲 𑐏𑑃 𑐎𑐣𑐵𑐡𑐶𑐳𑐾𑑄 𑐰𑐳𑐥𑑀𑐮 𑐕𑐩𑑂𑐴 𑐀𑐣𑑂𑐫𑐵𑐫, 𑐀𑐟𑑂𑐫𑐵𑐔𑐵𑐬, 𑐄𑐟𑑂𑐥𑐷𑐜𑐣 𑐳𑐴 𑐫𑐵𑐫𑐾 𑐩𑐦𑐸𑐩𑑂𑐴 𑐰𑑂𑐫𑐎𑑂𑐟𑐶𑐟𑑂𑐰 𑐖𑐹𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐄𑐐𑐸 𑐴𑐾 𑐖𑑂𑐫𑐵𑐗𑑂𑐰𑐮𑐫𑑂 𑐨𑐵𑐲𑐵 𑐁𑐫𑑀𑐐𑐫𑐵 𑐡𑐸𑐖𑐮𑐫𑑂 𑐣𑐶𑐫𑐸𑐎𑑂𑐟 𑐖𑐸𑐫𑐵𑐡𑐷𑐩𑑂𑐴 𑐳𑐸𑐬𑐾𑐱 𑐩𑐵𑐣𑐣𑑂𑐢𑐬 𑐰 𑐧𑐵𑐐𑐩𑐟𑐶 𑐥𑑂𑐬𑐡𑐾𑐱𑐫𑐵 𑐳𑑄𑐳𑑂𑐎𑐺𑐟𑐶, 𑐥𑐬𑑂𑐫𑐚𑐣 𑐰 𑐳𑐴𑐎𑐵𑐬𑐷 𑐩𑐣𑑂𑐟𑑂𑐬𑐷 𑐱𑐿𑐮𑐾𑐣𑑂𑐡𑑂𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫𑐫𑐵𑐟 𑐩𑐹𑐥𑐵𑐴𑐵𑑄𑐥𑐵𑐏𑐾𑑄 𑐏𑐵𑐡𑐵 𑐎𑑂𑐰𑐏𑐵𑐫𑐾𑐎𑐵𑑅 𑐨𑐶𑑄𑐟𑐸𑐣𑐵 𑐡𑐾𑐕𑐵𑐳𑐾 𑐴𑐣𑐾𑐖𑑂𑐫𑐵 𑐣𑑄 𑐫𑐵𑑅𑐐𑐸 𑐏𑑅 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐥𑐸𑐮𑐵𑑄𑐩𑑂𑐴 𑐩𑐣𑑂𑐟𑑂𑐬𑐷 𑐨𑐶𑐩𑐳𑐾𑐣𑐡𑐵𑐳 𑐥𑑂𑐬𑐢𑐵𑐣, 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐣𑐵𑐫𑑅 𑐥𑐰𑐶𑐟𑑂𑐬 𑐰𑐖𑑂𑐬𑐵𑐔𑐵𑐬𑑂𑐫, 𑐢𑐬𑑂𑐩𑑀𑐡𑐫 𑐳𑐨𑐵𑐫𑐵 𑐩𑐴𑐵𑐳𑐔𑐶𑐰 𑐳𑐵𑐐𑐬𑐩𑐵𑐣 𑐰𑐖𑑂𑐬𑐵𑐔𑐵𑐬𑑂𑐫, 𑐳𑐩𑐵𑐖𑐳𑐾𑐰𑐷 𑐩𑐴𑐾𑐣𑑂𑐡𑑂𑐬 𑐱𑐵𑐎𑑂𑐫𑐥𑐶𑐣𑐶𑐐𑐸 𑐄𑐥𑐳𑑂𑐠𑐶𑐟𑐶 𑐡𑐸𑐐𑐸 𑐏𑑅 𑑋
𑐄𑐐𑐸 𑐂𑐮𑐫𑑂 𑐖𑑂𑐫𑐵𑐗𑑂𑐰𑑅𑐫𑐵 𑐳𑐨𑐵𑐣𑐵𑐫𑑅 𑐎𑐬𑑂𑐞𑐾𑐮 𑐃. 𑐰𑐖𑑂𑐬𑐵𑐔𑐵𑐬𑑂𑐫𑑄 𑐥𑑄. 𑐧𑐡𑑂𑐬𑐷𑐬𑐟𑑂𑐣 𑐀𑐣𑐸𑐳𑐣𑑂𑐢𑐵𑐣 𑐰𑐺𑐟𑑂𑐟𑐶𑐫𑐵 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅𑑋 𑐰𑐫𑑂𑐎𑐮𑑄 𑐰𑐖𑑂𑐬𑐵𑐔𑐵𑐬𑑂𑐫 𑐳𑐩𑐸𑐡𑐵𑐫𑐫𑐵 𑐠𑐷𑐠𑐷 𑐥𑐎𑑂𑐲𑐫𑑂 𑐀𑐣𑐸𑐳𑐣𑑂𑐢𑐵𑐣 𑐫𑐵𑐫𑐾𑐟 𑐣𑐾𑐥𑐵𑐮𑐨𑐵𑐲𑐵𑐫𑑂 𑐳𑑂𑐣𑐵𑐟𑐎𑑀𑐟𑑂𑐟𑐬 𑐫𑐵𑐣𑐵𑐔𑑂𑐰𑑄𑐥𑐶𑐣𑐶𑐐𑐸 𑐣𑐶𑑄𑐟𑐶𑑄 𑐀𑐢𑑂𑐫𑐫𑐣 𑐩𑐞𑑂𑐜𑐮𑐥𑐵𑐏𑐾𑑄 𑐠𑑂𑐰 𑐰𑐶𑐡𑑂𑐰𑐟 𑐰𑐺𑐟𑑂𑐟𑐶 𑐥𑑂𑐬𑐡𑐵𑐣 𑐫𑐵𑐫𑐾𑐐𑐸 𑐑𑑀𑐲𑐞𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋