𑐰𑐶𑐱𑐵𑐮𑐣𑐐𑐬𑐫𑑂 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵

𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵 𑐫𑐾𑑃𑐫𑐵 𑐐𑑂𑐰𑐳𑐵𑐮𑐫𑑂 𑐳𑑂𑐰𑐎𑑂𑐰𑑅𑐐𑐸 𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵 𑐰𑐶𑐱𑐵𑐮𑐣𑐐𑐬 𑐴𑐵𑐜𑐷𑐐𑐵𑑄𑐫𑐵 𑐨𑐶𑑄𑐡𑑂𑐫𑑅𑐫𑐵𑐠𑐵𑐫𑑂 𑐖𑐸𑐮 𑑋 𑐖𑑂𑐫𑐵𑐗𑑂𑐰𑑅 𑐳𑑂𑐠𑐵𑐣𑐷𑐫 𑐡𑐾𑐫𑑂 𑐠𑐎𑐵𑐮𑐷 𑐡𑐾𑐰𑐡𑐵𑐳 𑐜𑑄𑐐𑑀𑐮𑑄 𑐟𑑂𑐰𑐵𑑅𑐡𑐾𑐰𑐵𑐫𑑂 𑐩𑐟 𑐔𑑂𑐫𑐵𑐎𑐵𑑅 𑐄𑐮𑐾𑐖𑑂𑐫𑐵 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐡𑐾𑐱 𑐳𑐵𑑄𑐳𑐡 𑐳𑐸𑐬𑐾𑐣𑑂𑐡𑑂𑐬𑐬𑐵𑐖 𑐐𑑀𑐳𑐵𑐃𑐣𑑄 𑐡𑐾𑐫𑑂 𑐠𑐎𑐵𑐮𑐷 𑐡𑐾𑐰𑐡𑐵𑐳 𑐜𑑄𑐐𑑀𑐮𑐫𑐵𑐟 𑐡𑑀𑐳𑐮𑑂𑐮𑐵 𑐣𑑂𑐫𑐫𑐾𑐎𑐵𑑅 𑐴𑐣𑐵𑐥𑑁 𑐡𑐾𑐕𑐵𑐳𑐾𑑄 𑐴𑐣𑐾𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑑅𑐫𑐵 𑐩𑐹𑐥𑐵𑐴𑐵𑑄 𑐳𑑄𑐑𑐷𑐫 𑐳𑐵𑑄𑐳𑐡 𑐥𑑂𑐬𑐾𑐩 𑐳𑐸𑐰𑐵𑐮𑑄 𑐳𑐵𑐴𑐶𑐟𑑂𑐫 𑐰𑐵𑐔𑐣𑐫𑑂 𑐣𑑂𑐴𑐵𑐥, 𑐮𑐶𑐄 𑐰 𑐮𑐶𑐫𑐵𑑄 𑐮𑐶𑐄 𑐮𑐵𑑅𑐥𑐶𑑄 𑐳𑐵𑐴𑐶𑐟𑑂𑐫𑐎𑐵𑐬𑐟𑐫𑑂𑐟 𑐳𑐶𑐬𑐥𑐵𑑅 𑐰 𑐡𑐳𑐶𑐥𑑁 𑐮𑑅𑐮𑑂𑐴𑐵𑐣𑐵𑐡𑐷𑐐𑐸 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐌𑐩𑐣𑐬𑐴𑐬𑐶 𑐱𑑂𑐬𑐾𑐲𑑂𑐛 𑐣𑑂𑐴𑐵𑐥, 𑐎𑐩𑐮𑐧𑐴𑐵𑐡𑐸𑐬 𑐜𑑄𑐐𑑀𑐮 𑐮𑐶𑐄, 𑐬𑐩𑐾𑐱𑐩𑐵𑐣 𑐩𑐴𑐬𑑂𑐖𑐣 𑐮𑐶𑐫𑐵𑑄 𑐮𑐶𑐄 𑐰 𑐥𑐹𑐬𑑂𑐞𑐶𑐩𑐵 𑐩𑐐𑐬𑐫𑐵𑐟 𑐴𑑅𑐥𑐵𑑅 𑐳𑐶𑐬𑐥𑐵𑑅 𑐮𑐵𑑅𑐐𑐸 𑐏𑑅 𑑋

𑐚𑑄𑐐𑐵𑐮 𑐩𑐵𑐰𑐶𑐫𑐵 𑐀𑐣𑐶𑐟𑐵 𑐧𑐳𑑂𑐫𑐮 𑐰 𑐀𑐣𑐶𑐟𑐵 𑐁𑐮𑐾𑐩𑐐𑐬𑐫𑐵 𑐣𑐾𑐥𑐵𑐮𑐨𑐵𑐲𑐵𑐫𑐵 𑐔𑐶𑐣𑐵𑐏𑑄 𑐳𑐸𑐬𑐸 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐮𑑀𑐎𑐎𑐰𑐶 𑐬𑐵𑐖𑐨𑐵𑐃 𑐖𑐎𑑅𑐩𑐶𑑄 𑐎𑐰𑐶𑐟𑐵𑐫𑑂 𑐰𑐶𑐔𑐵𑐬 𑐥𑐎𑑂𑐲 𑐣𑐵𑐥𑑄 𑐎𑐮𑐵 𑐥𑐎𑑂𑐲 𑐣𑑄 𑐧𑐵𑑄𑐮𑐵𑐫𑐾𑐩𑐵𑑅 𑐢𑐫𑐵𑐡𑐶𑐳𑐾𑑄 𑐣𑑂𑐴𑐹𑐥𑐶𑑄 𑐔𑑂𑐰𑐩𑐶𑐥𑐶𑑄𑐟 𑐴𑑁𑐳𑐮𑐵 𑐧𑐷𑐎𑐠𑑄𑐫𑐵 𑐩𑐔𑐵 𑐔𑐶𑐣𑐵𑐏𑑃 𑐣𑑂𑐫𑑄𑐎𑐵𑐡𑐷𑐐𑐸 𑐏𑑅 𑑋 𑐴𑐵𑐜𑐷𑐐𑐵𑑄𑐫𑐵 𑐧𑐵𑐬𑐾 𑐰𑐶𑐖𑑂𑐘 𑐂𑐟𑐶𑐴𑐵𑐳𑐎𑐵𑐬 𑐜𑐵. 𑐳𑐸𑐡𑐬𑑂𑐱𑐣𑐬𑐵𑐖 𑐟𑐶𑐰𑐵𑐬𑐷𑑄 𑐨𑐵𑐲𑐵, 𑐎𑐮𑐵, 𑐳𑐵𑐴𑐶𑐟𑑂𑐫, 𑐰𑐵𑐳𑑂𑐟𑐸𑐎𑐮𑐵, 𑐢𑐬𑑂𑐩 𑐳𑑄𑐳𑑂𑐎𑐺𑐟𑐶𑐫𑐵 𑐎𑐾𑐣𑑂𑐡𑑂𑐬𑐫𑑂 𑐴𑐾 𑐔𑑂𑐰𑐣𑐵 𑐠𑐖𑑂𑐫𑐵𑑅𑐐𑐸 𑐖𑑂𑐫𑐵𑐗𑑂𑐰𑑅 𑐖𑐹𑐐𑐸 𑐟𑐳𑐎𑑄 𑐧𑐵𑑄𑐮𑐵𑑅 𑐢𑐫𑐵𑐡𑐶𑐳𑐾𑑄 𑐮𑐶𑐔𑑂𑐕𑐰𑐶𑐎𑐵𑐮 𑐟𑐎 𑐣𑑄 𑐬𑐵𑐖𑐢𑐵𑐣𑐷 𑐖𑐸𑐫𑐵𑐔𑑂𑐰𑑄𑐐𑐸 𑐴𑐵𑐜𑐷𑐐𑐵𑑄 𑐰𑐶𑐱𑐵𑐮𑐣𑐐𑐬 𑐩𑐮𑑂𑐮𑐎𑐵𑐮 𑐮𑐶𑐥𑐵 𑐟𑐴𑐳𑐣𑐴𑐳 𑐖𑐹𑐰𑑄𑐳𑐵𑑄 𑐠𑐣𑐫𑐵 𑐋𑐟𑐶𑐴𑐵𑐳𑐶𑐎 𑐰𑐶𑐲𑐫𑐰𑐳𑑂𑐟𑐸 𑐁𑑅 𑐣𑑄 𑐖𑑂𑐰𑑅𑐩𑐡𑐸𑐐𑐸 𑐡𑐣𑐶 𑐢𑐫𑐵𑐡𑐶𑐮 𑑋

𑐣𑐾𑐥𑐵𑐮𑐨𑐵𑐲𑐵 𑐳𑐵𑐴𑐶𑐟𑑂𑐫 𑐟𑑅𑐩𑐸𑑃𑐖𑑂𑐫𑐵𑐫𑐵 𑐣𑐵𑐫𑑅 𑐬𑐟𑑂𑐣𑐵 𑐱𑐾𑐬𑑂𑐥𑐵 𑐜𑑄𑐐𑑀𑐮𑐫𑐵 𑐳𑐨𑐵𑐥𑐟𑐶𑐟𑑂𑐰𑐫𑑂 𑐖𑐹𑐐𑐸 𑐖𑑂𑐫𑐵𑐗𑑂𑐰𑐮𑐫𑑂 𑐧𑐵𑐐𑐩𑐟𑐷 𑐥𑑂𑐬𑐡𑐾𑐱𑐫𑐵 𑐳𑐵𑑄𑐳𑐡 𑐬𑐵𑐖𑐾𑐣𑑂𑐡𑑂𑐬 𑐥𑑂𑐬𑐖𑐵𑐥𑐟𑐶, 𑐨𑐾𑐚𑐾𑐣𑐬𑐷 𑐜𑐵𑐎𑑂𑐚𑐬 𑐀𑐣𑑂𑐖𑐶𑐬𑐩𑐵𑐣 𑐳𑐶𑑄, 𑐳𑐵𑐴𑐶𑐟𑑂𑐫𑐎𑐵𑐬 𑐬𑑀𑐔𑐎 𑐑𑐶𑐩𑐶𑐬𑐾, 𑐥𑑂𑐬𑐵. 𑐢𑐬𑑂𑐩𑐬𑐵𑐖 𑐜𑑄𑐐𑑀𑐮, 𑐔𑐣𑑂𑐡𑑂𑐬𑐧𑐴𑐵𑐡𑐸𑐬 𑐱𑑂𑐬𑐾𑐲𑑂𑐛, 𑐩𑐴𑐣𑑂𑐟 𑐩𑐴𑐬𑑂𑐖𑐣 𑐮𑐐𑐵𑐫𑐟𑐫𑐵 𑐳𑐵𑐴𑐶𑐟𑑂𑐫𑐎𑐵𑐬, 𑐮𑐾𑐏𑐎 𑐰 𑐔𑑂𑐰𑐩𑐶𑐥𑐶𑑄𑐳𑑄 𑐠𑑅𑐠𑑅𑐐𑐸 𑐣𑑂𑐰𑐔𑐸 𑐰 𑐬𑐔𑐣𑐵 𑐣𑑂𑐴𑑂𑐫𑐧𑑂𑐰𑐫𑐵𑐡𑐷𑐐𑐸 𑐏𑑅 𑑋