𑐱𑑂𑐫𑐵𑐩𑐳𑐸𑐣𑑂𑐡𑐬 𑐳𑐫𑑃𑐖𑐸𑐫𑐵 𑐴𑐵𑐂𑐎𑐸 𑐎𑐶𑐔𑑅 𑐰𑐶𑐩𑑀𑐔𑐣

𑐰𑑄𑐐𑐸 𑐱𑐣𑐶𑐰𑐵𑑅 𑐀𑐣𑑂𑐟𑐬𑐵𑐲𑑂𑐚𑑂𑐬𑐶𑐫 𑐴𑐵𑐂𑐎𑐸 𑐡𑐶𑐰𑐳𑐫𑐵 𑐮𑐳𑐟𑐵𑐫𑑂 𑐩𑐴𑐵𑐣𑑂𑐫𑐵𑐫𑐵𑐢𑐶𑐰𑐎𑑂𑐟𑐵 𑐎𑐵𑐬𑑂𑐫𑐵𑐮𑐫𑐫𑐵 𑐐𑑁𑐟𑐩 𑐧𑐸𑐡𑑂𑐢 𑐳𑐨𑐵𑐎𑐎𑑂𑐲 𑐨𑐰𑐣, 𑐳𑐶𑑄𑐴𑐡𑐬𑐰𑐵𑐬𑐫𑑂 𑐖𑐹𑐐𑐸 𑐕𑐐𑐹 𑐳𑐩𑐵𑐬𑑀𑐴𑐳 𑐥𑐸𑐮𑐵𑑄𑐩𑑂𑐴 𑐥𑑂𑐬𑐢𑐵𑐣𑐣𑑂𑐫𑐵𑐫𑐵𑐢𑐶𑐱 𑐎𑐮𑑂𑐫𑐵𑐞 𑐱𑑂𑐬𑐾𑐲𑑂𑐛𑑄 𑐴𑐵𑐂𑐖𑐶𑐣 𑐱𑑂𑐫𑐵𑐩𑐳𑐸𑐣𑑂𑐡𑐬 𑐳𑐫𑑃𑐖𑐸𑐫𑐵 𑐴𑐵𑐂𑐎𑐸 𑐩𑐸𑐣𑐵 𑐳𑐦𑐹 ‘𑐴𑐵𑐂𑐎𑐸 𑐎𑐶𑐔𑑅’ 𑐰𑐶𑐩𑑀𑐔𑐣 𑐫𑐵𑐣𑐵𑐡𑐶𑐮 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐣𑑂𑐰𑐰𑐵𑐣𑐵𑐡𑐶𑐳𑐾𑑄 𑐩𑐹𑐥𑐵𑐴𑐵𑑄 𑐨𑐵𑐖𑐸 𑐱𑑂𑐬𑐾𑐲𑑂𑐛𑑄 𑐩𑑂𑐴𑑀 𑐱𑐧𑑂𑐡, 𑐐𑐴𑐣 𑐧𑐶𑐲𑐫, 𑐐𑐴𑐣 𑐳𑐩𑑂𑐥𑑂𑐬𑐾𑐱𑐣, 𑐐𑐴𑐣 𑐔𑐾𑐟𑐣𑐵𑐫𑐵𑐟 𑐳𑐱𑐎𑑂𑐟 𑐬𑐸𑐥𑑄 𑐣𑑂𑐴𑑂𑐫𑐧𑑂𑐰𑐫𑐾𑐐𑐸 𑐩𑐵𑐢𑑂𑐫𑐩 𑐴𑐵𑐂𑐎𑐸 𑐖𑐹𑐐𑐸 𑐢𑐫𑐵𑐡𑐶𑐳𑐾𑑄 𑐠𑑅𑐟 𑐣𑑄 𑐴𑐵𑐂𑐎𑐸𑑄 𑐳𑐵𑐮𑐵𑐎𑐵𑑅𑐐𑐸 𑐏𑑃 𑐢𑐫𑐵𑐡𑐶𑐮 𑑋
𑐣𑐾𑐰𑐵𑑅 𑐴𑐵𑐂𑐎𑐸 𑐏𑑂𑐫𑑅𑐫𑐵 𑐣𑐵𑐫𑑅 𑐳𑐸𑐬𑐾𑐱 𑐥𑑂𑐬𑐢𑐵𑐣𑐫𑐵 𑐖𑑂𑐫𑐵𑐗𑑂𑐰𑑅𑐫𑐵 𑐳𑐨𑐵𑐥𑐟𑐶𑐟𑑂𑐰 𑐫𑐵𑐳𑐾𑑄 𑐣𑐾𑐥𑐵𑐮𑐫𑑂 𑐴𑐵𑐂𑐎𑐸 𑐔𑑂𑐰𑐫𑐾𑐐𑐸 𑐖𑑂𑐫𑐵 𑐣𑑂𑐴𑑂𑐫𑐵𑑅𑐐𑐸 𑐃 (𑐣𑐾.𑐳𑑄. 𑑑𑑐𑑗𑑙, (𑑒𑑐𑑑𑑖 𑐳𑐵𑐮𑑄) 𑐮𑑄 𑐣𑐶𑐳𑐾𑑄 𑐴𑐾 𑐴𑐵𑐂𑐎𑐸 𑐔𑑂𑐰𑐫𑐵 𑐰𑐫𑐵𑐔𑑂𑐰𑐣𑐵𑐡𑐷𑐩𑑂𑐴 𑐨𑐵𑐖𑐸 𑐱𑑂𑐫𑐵𑐩𑐳𑐸𑐣𑑂𑐡𑐬 𑐳𑐫𑑃𑐖𑐸𑐫𑐵 𑐴𑐵𑐂𑐎𑐸𑐟 𑐥𑐵𑐞𑑂𑐜𑐸𑐮𑐶𑐥𑐶𑐂 𑐖𑐎 𑐮𑐶𑐎𑐸𑐣𑐵𑐔𑑂𑐰𑑄𑐐𑐸 𑐏𑑃 𑐣𑑂𑐴𑑂𑐫𑐠𑑃𑐳𑐾𑑄 𑐠𑐸𑐥𑐶𑑄 𑐥𑐵𑐞𑑂𑐜𑐸𑐮𑐶𑐥𑐶𑐟 𑐳𑐦𑐹𑐫𑐵 𑐬𑐸𑐥𑐫𑑂 𑐥𑐶𑐟𑐧𑐶𑐂𑐩𑐵𑑅𑐐𑐸 𑐠𑑁𑑄𑐫𑐵 𑐁𑐰𑐱𑑂𑐫𑐎𑐟𑐵𑐫𑐵𑐟 𑐣𑐾𑐰𑐵𑑅 𑐴𑐵𑐂𑐎𑐸 𑐏𑑂𑐫𑐮𑑄 𑐩𑐴𑐳𑐸𑐳 𑐫𑐵𑐣𑐵𑑅 𑐠𑑂𑐰 𑐖𑑂𑐫𑐵 𑐣𑑂𑐴𑑂𑐫𑐵𑐎𑐵𑐐𑐸 𑐏𑑅 𑐢𑐫𑐵𑐡𑐶𑐮 𑑋
𑐰𑐫𑑂𑐎𑐮𑑄 𑐳𑐫𑑃𑐖𑐸𑐫𑐵 𑐴𑐵𑐂𑐎𑐸𑐂 𑐠𑐩𑑂𑐴𑑄 𑐣𑑂𑐴𑐶𑐫𑐵𑐣𑑂𑐴𑐶𑐠𑑄𑐫𑐵 𑐖𑐷𑐰𑐣𑐫𑑂 𑐏𑑄𑐐𑐸 𑐰 𑐀𑐣𑐸𑐨𑐰 𑐫𑐵𑐣𑐵𑐐𑐸 𑐧𑐶𑐲𑐫, 𑐑𑐚𑐣𑐵, 𑐄𑐎𑐶𑐫𑐵 𑐡𑐠𑐸𑐂 𑐡𑐸𑐐𑐸 𑐀𑐣𑑂𑐟𑐬𑐰𑐶𑐬𑑀𑐢, 𑐳𑑄𑐑𑐬𑑂𑐲, 𑐰𑐶𑐜𑐩𑑂𑐧𑐣𑐵 𑐁𑐡𑐶𑐫𑐵𑐟 𑐠𑐷𑐠𑐷𑐎𑐠𑑄 𑐰𑐶𑐱𑑂𑐮𑐾𑐲𑐞 𑐫𑐵𑐣𑐵𑑅, 𑐔𑐶𑐣𑑂𑐟𑐣 𑐫𑐵𑐣𑐵𑑅 𑐀𑐨𑐶𑐰𑑂𑐫𑐎𑑂𑐟 𑐫𑐵𑐣𑐵𑐟𑑅𑐐𑐸 𑐏𑑃 𑐣𑑂𑐴𑑂𑐫𑐠𑐣𑐵𑐡𑐶𑐮 𑑋
𑐖𑑂𑐫𑐵𑐗𑑂𑐰𑐮𑐫𑑂 𑐰𑐬𑐶𑐲𑑂𑐛 𑐎𑐰𑐶, 𑐳𑐩𑐵𑐮𑑀𑐔𑐎 𑐜𑐵. 𑐁𑐣𑐣𑑂𑐡 𑐖𑑀𑐱𑐷𑑄 𑐎𑐰𑐶 𑐳𑐫𑑃𑐖𑐸 𑐣𑐾𑐥𑐵𑐮𑐨𑐵𑐲𑐵𑐫𑐵 𑐁𑐢𑐸𑐣𑐶𑐎 𑐐𑐡𑑂𑐫 𑐎𑐰𑐶𑐟𑐵𑐫𑐵 𑐕𑐩𑑂𑐴 𑐣𑑂𑐴𑑂𑐫𑐮𑐸𑐰𑐵𑑅 𑐎𑐰𑐶 𑐖𑐹𑐐𑐸 𑐏𑑃 𑐣𑑂𑐴𑑂𑐫𑐠𑑃𑐳𑐾𑑄𑑄 𑐰𑐫𑑂𑐎𑑅𑐫𑐵 𑐴𑐵𑐂𑐎𑐸𑑄 𑐣𑐾𑐥𑐵𑐮𑐨𑐵𑐲𑐵𑐫𑑂 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐥𑐬𑐩𑑂𑐥𑐬𑐵𑐐𑐟 𑐴𑐵𑐂𑐎𑐸 𑐰 𑐁𑐢𑐸𑐣𑐶𑐎 𑐴𑐵𑐂𑐎𑐸𑐫𑐵 𑐡𑐠𑐸𑐂 𑐔𑑂𑐰𑐣𑐵𑑅 𑐟𑐵𑑃𑐫𑐵 𑐨𑐹𑐩𑐶𑐎𑐵 𑐣𑐶𑐬𑑂𑐰𑐵𑐴 𑐫𑐵𑑅𑐐𑐸 𑐏𑑃 𑐎𑐣𑐵𑐡𑐶𑐮 𑑋
𑐀𑐠𑐾𑐴𑐾 𑐳𑐥𑐹m𑐫𑐵 𑐥𑑂𑐬𑐎𑐵𑐱𑐎 𑐰𑐬𑐶𑐲𑑂𑐛 𑐀𑐢𑐶𑐰𑐎𑑂𑐟𑐵 𑐱𑑂𑐫𑐵𑐩𑐳𑐸𑐣𑑂𑐡𑐬 𑐳𑐫𑑃𑐖𑐸𑐫𑐵 𑐟𑑅𑐢𑐶𑐎𑑅𑐩𑑂𑐴 𑐩𑑂𑐴𑑂𑐫𑐵𑐫𑑂 𑐩𑐫𑑂𑐖𑐸 𑐀𑐩𑐶𑐟𑐵𑐮𑐎𑑂𑐲𑑂𑐩𑐷 𑐳𑐫𑑂𑑃𑐖𑐸 𑐱𑑂𑐬𑐾𑐲𑑂𑐛𑑄 𑐮𑐶𑐧𑐵𑐎𑑂𑐎 𑐴𑐾 𑐖𑐹𑐳𑐵𑑄 𑐠𑑅 𑐀𑐧𑐸𑐫𑐵 𑐎𑐺𑐟𑐶𑐫𑐵𑐟 𑐥𑐶𑐠𑐣𑐾 𑐡𑐸𑐐𑐸𑐮𑐶𑑄 𑐠𑑅𑐥𑐶𑐣𑐶 𑐳𑐎𑐮 𑐖𑑅 𑐟𑐳𑐎𑑄 𑐮𑐫𑑂𑐟𑐵𑐫𑐵𑐔𑑂𑐰𑐣𑐵𑐐𑐸 𑐡𑐸 𑐢𑐫𑐵𑐡𑐶𑐮 𑑋 𑐠𑑅 𑐀𑐧𑐸 𑐱𑑂𑐫𑐵𑐩𑐳𑐸𑐣𑑂𑐡𑐬 𑐳𑐫𑑃𑐖𑐸𑐫𑐵 𑐰𑐴𑐸𑐁𑐫𑐵𑐩𑐶𑐎 𑐰𑑂𑐫𑐎𑑂𑐟𑐶𑐟𑑂𑐰𑐫𑐵 𑐠𑐷𑐠𑐷 𑐥𑐎𑑂𑐲𑐫𑐵𑐟 𑐡𑐸𑐰𑐵𑐮𑐵𑐡𑐶𑐳𑐾 𑐰𑐫𑑂𑐎𑐮𑑄 𑐠𑑅 𑐀𑐧𑐸𑑄 𑐔𑑂𑐰𑐫𑐵𑐠𑐎𑐵𑐡𑐷𑐐𑐸 𑐬𑐧𑐶𑐣𑑂𑐡𑑂𑐬𑐣𑐵𑐠 𑐚𑐿𑐐𑑀𑐬𑐫𑐵 𑐀𑐣𑐸𑐰𑐵𑐡 ‘𑐐𑐶𑐟𑐵𑐣𑑂𑐖𑐮𑐶’ 𑐰 𑐏𑐳𑑂 𑐣𑐾𑐥𑐵𑐮𑐷 𑐨𑐵𑐲𑐵𑐫𑑂 𑐔𑑂𑐰𑐫𑐵𑐡𑐷𑐐𑐸 ‘𑐔𑐳𑑂𑐎𑐵𑐴𑐬𑐸 𑐑𑐵𑐄𑐎𑐵’ 𑐢𑐫𑐵𑐐𑐸 𑐎𑐰𑐶𑐟𑐵 𑐳𑐥𑐹m 𑐣𑑄 𑐫𑐵𑐎𑐣𑑄 𑐥𑑂𑐬𑐎𑐵𑐱𑐣𑐫𑑂 𑐴𑐫𑐾𑐐𑐸 𑐏𑑃 𑐎𑐣𑐵𑐡𑐶𑐮 𑑋
𑐣𑐾𑐰𑐵𑑅 𑐴𑐵𑐂𑐎𑐸 𑐏𑑂𑐫𑑅𑐫𑐵 𑐐𑑂𑐰𑐳𑐵𑐮𑐫𑑂 𑐖𑐹𑐐𑐸 𑐄𑐐𑐸 𑐖𑑂𑐫𑐵𑐗𑑂𑐰𑑅 𑐢𑐬𑑂𑐩𑐎𑐺𑐲𑑂𑐞 𑐳𑐶𑐎𑑅𑐩𑐶𑑄 𑐣𑑂𑐴𑑂𑐫𑐵𑐎𑐵𑐡𑐷𑐐𑐸 𑐏𑑅 𑑋 𑐖𑑂𑐫𑐵𑐗𑑂𑐰𑐮𑐫𑑂 𑐳𑐵𑐴𑐶𑐟𑑂𑐫𑐎𑐵𑐬 𑐩𑑀𑐴𑐣 𑐡𑐸𑐰𑐵𑐮, 𑐳𑐵𑐴𑐶𑐟𑑂𑐫𑐎𑐵𑐬 𑐜𑐵. 𑐳𑐸𑐩𑐣 𑐟𑐵𑐩𑑂𑐬𑐵𑐎𑐵𑐬, 𑐴𑐵𑐂𑐖𑐶𑐣 𑐮𑐶𑐳𑐾𑑄 𑐣𑐾𑐰𑐵𑑅 𑐴𑐵𑐂𑐎𑐸 𑐏𑑂𑐫𑑅𑐫𑐵 𑐣𑑂𑐰𑐎𑐹 𑐨𑐵𑐖𑐸 𑐟𑐸𑐫𑐸𑐥𑐸𑑄 𑐣𑑄 𑐎𑐰𑐶 𑐱𑑂𑐫𑐵𑐩𑐳𑐸𑐣𑑂𑐡𑐬 𑐰 𑐰𑐫𑑂𑐎𑑅𑐫𑐵 𑐴𑐵𑐂𑐎𑐸𑐫𑐵 𑐠𑐷𑐠𑐷 𑐥𑐎𑑂𑐲𑐫𑐵𑐟 𑐎𑐫𑐵𑑅 𑐠𑑅𑐐𑐸 𑐣𑐸𑐐𑑅 𑐏𑑃 𑐥𑑂𑐰𑑄𑐎𑐵𑐡𑐷𑐐𑐸 𑐏𑑅 𑑋