𑐳𑐶𑐎𑑂𑐎𑐶𑐩𑐫𑐵 𑐦𑐳𑐫𑑂‌ “ 𑐟𑐵𑐏𑑀𑐟𑐵 𑐡𑑂𑐫𑐵𑑄𑐡𑑂𑐫𑐵𑑄”𑐫𑐵 𑐳𑑅

𑐬𑐵𑐖𑐸 𑐥𑑂𑐬𑐢𑐵𑐣 𑐔𑐵𑐣𑑂𑐴𑐫𑑂‌ ‘𑐟𑐵𑐏𑑀𑐟𑐵 𑐡𑑂𑐫𑐵𑑄𑐡𑑂𑐫𑐵𑑄 𑐟𑐵𑐟𑐵𑐏𑑀𑐟𑐵 𑐡𑑂𑐫𑐵𑑄𑐡𑑂𑐫𑐵𑑄’ 𑐢𑐎𑐵𑑅 𑐣𑑂𑐴𑑂𑐫𑐮𑐫𑑂‌ 𑐮𑐶𑐳𑐵 𑐮𑐶𑐳𑐵 𑐎𑐫𑐵𑑅 𑐴𑐵𑐮𑐵𑐔𑑂𑐰𑐣 𑑋 𑐰𑐫𑐵 𑐮𑐶𑐎𑑂𑐎 𑐡𑑂𑐫𑑄𑐥𑐶𑑄 𑐢𑐵𑑅𑐳𑐵 𑐰 𑐣𑑂𑐴𑐹𑐐𑐸 𑐴𑐾 𑐨𑐵𑐳𑑄 𑐴𑐵𑑅𑐐𑐸𑐮𑐶𑑄 𑐖𑑂𑐫𑑅 𑐖𑐸𑐮 𑑋 𑐬𑐵𑐖𑐸 𑐄𑐎𑐸𑐣𑑂𑐴𑐸𑐣𑐶𑐳𑐾𑑄 ‘𑐥𑑂𑐬𑐢𑐵𑐣 𑐳𑑂𑐎𑐹𑐮’𑐫𑑂‌ 𑐰𑑄𑐐𑐸, ‘𑐥𑑂𑐬𑐢𑐵𑐣 𑐨𑐵𑐫𑑂‌’ 𑐣𑑂𑐰𑐰𑐵𑑅𑐐𑐸 𑐩𑐏𑐵 𑐖𑐸𑐂 𑐢𑐎𑐵𑑅 𑐂𑐩𑐶𑐳𑑄 𑐟𑐵𑐫𑐾𑐎𑐮 𑑋 𑐮𑐶𑐥𑐵 𑐂𑐩𑐶𑐳𑑄 𑐳𑐶𑐮 ‘𑐟𑐵𑐏𑑀𑐟𑐵 𑐡𑑂𑐫𑐵𑑄𑐡𑑂𑐫𑐵𑑄 𑐟𑐵𑐟𑐵𑐏𑑀𑐟𑐵 𑐡𑑂𑐫𑐵𑑄𑐡𑑂𑐫𑐵𑑄’ 𑐮𑐵 𑐕𑐟𑐵𑐖𑐶 ‘𑐥𑑂𑐬𑐢𑐵𑐣 𑐧𑐵𑐖𑐵’𑐫𑐵 𑐠𑐵𑐫𑐾𑐐𑐸 𑐧𑑀𑐮 𑐏𑐣𑐶𑑄 𑑋 𑐳𑐶𑐎𑑂𑐎𑐶𑐩𑐫𑐵 𑐐𑐿𑐬 𑐣𑐾𑐰𑐵𑑅𑐟𑐫𑑂‌𑐳𑑄 𑐖𑐎 𑐩𑐏𑐸 𑐫𑐎𑑂𑐰 𑐣𑐾𑐰𑐵𑑅𑐟𑐫𑑂‌𑐳𑑄 𑐣𑑄 𑐣𑐾𑐰𑐵𑑅 𑐨𑐵𑐫𑑂‌𑐫𑐵𑐟 ‘𑐥𑑂𑐬𑐢𑐵𑐣 𑐨𑐵𑐲𑐵’ 𑐢𑐵𑐫𑐾𑐐𑐸 𑐫𑐵𑑅, 𑐀𑐮𑐾 𑐣𑐾𑐰𑐵𑑅 𑐳𑑄𑐳𑑂𑐎𑐺𑐟𑐶𑐫𑐵𑐟 ‘𑐥𑑂𑐬𑐢𑐵𑐣 𑐳𑑄𑐳𑑂𑐎𑐺𑐟𑐶’ 𑑋 𑐩𑐸𑐎𑑂𑐎𑑄 𑐣𑐷𑐣𑑂𑐫𑐵𑐡𑑂𑐢𑑅𑐟𑐶𑐫𑐵 𑐮𑑂𑐫𑐵𑐏𑐫𑑂‌ 𑐳𑐶𑐎𑑂𑐎𑐶𑐩𑐫𑐵 𑐎𑐸𑑄𑐎𑐸𑐮𑐵𑐩𑐫𑑂‌ 𑐣𑑂𑐫𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂‌𑐳𑑄 𑐠𑑅𑐐𑐸 𑐣𑐵𑑄𑐫𑐵 𑐮𑑂𑐫𑐹𑐣𑐾 𑐥𑑂𑐬𑐢𑐵𑐣 𑐴𑐾 𑐔𑑂𑐰𑐫𑐾𑐐𑐸 𑐫𑐵𑑅 𑑋 𑐫𑐡𑑂𑐫𑐥𑐶 𑐂𑐩𑐶𑐐𑐸 𑐠𑐬 𑐩𑐾𑐩𑐾𑐐𑐸 𑐣𑑄 𑐩𑐡𑐸𑐐𑐸 𑐩𑐏𑐸 𑑋 𑐳𑐶𑐎𑑂𑐎𑐶𑐩𑐫𑐵 𑐣𑐶𑐟𑐶𑑄 𑐣𑐾𑐰𑐵𑑅 𑐰 𑐥𑑂𑐬𑐢𑐵𑐣 𑐥𑐫𑐵𑐬𑑂𑐫𑐰𑐵𑐔𑐷 𑐴𑐾 𑐖𑐸𑐂 𑐢𑐸𑑄𑐎𑐮 𑑋

𑐣𑐾.𑐳𑑄. 𑑑𑑑𑑒𑑐 𑐫𑐵 𑐱𑑂𑐬𑐷𑐥𑑄𑐔𑐩𑐶, 𑐠𑑂𑐰 𑐡𑐶𑑄 𑐳𑐶𑐎𑑂𑐎𑐶𑐩𑐫𑐵 𑐥𑑂𑐬𑐢𑐵𑐣 (𑐣𑐾𑐰𑐵𑑅)𑐟𑐫𑑂‌𑐐𑐸 𑐣𑐶𑐟𑐶𑑄 𑐕𑐐𑐹 𑐮𑑂𑐰𑑅𑐩𑐩𑐣𑐷𑐐𑐸 𑐡𑐶𑑄 𑐖𑐸𑐫𑐵𑐧𑑂𑐫𑐹𑐐𑐸 𑐡𑐸 𑑋 𑐠𑑂𑐰 𑐎𑐸𑐣𑑂𑐴𑐸 𑐀𑐣 𑐕𑐐𑐹 𑐳𑑂𑐎𑐸𑐮 𑐔𑐵𑐮 𑑋 𑐣𑐾𑐰𑐵𑑅 𑐨𑐵𑐫𑑂‌ 𑐰 𑐳𑑄𑐳𑑂𑐎𑐺𑐟𑐶 𑐳𑑂𑐫𑐣𑐷𑐐𑐸 𑐧𑐶𑐳𑑂𑐎𑑄 𑐳𑑂𑐎𑐹𑐮 𑑋 𑐳𑑂𑐎𑐹𑐮𑐫𑐵 𑐣𑐵𑑄 ‘𑐣𑐾𑐰𑐵𑑅 𑐨𑐵𑐲𑐵 𑐰 𑐳𑑄𑐳𑑂𑐎𑐺𑐟𑐶 𑐰𑐶𑐡𑑂𑐫𑐵𑐮𑐫’ 𑐏𑑅 𑑋 𑐠𑐸𑐐𑐸 𑐳𑑂𑐎𑐹𑐮 𑐔𑐵𑐳𑐵𑑄𑐣𑐶𑐳𑐾𑑄 𑐀𑐣 𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐧𑐵𑐖𑑄 𑐰 𑐥𑑂𑐫𑐵𑐏𑑄 𑐳𑑂𑐫𑐣𑐾𑐐𑐸 𑐖𑑂𑐫𑐵 𑐣𑑄 𑐱𑐸𑐬𑐸 𑐖𑐹𑐐𑐸 𑐏𑑅 𑑋

𑐂𑐩𑐶𑐳𑑄 𑐐𑐧𑑂𑐮𑐾𑑄 𑐩𑑂𑐴𑐥𑐸𑐖𑐵 𑐫𑐵𑐫𑐾𑐩𑐣𑑄 𑑋 𑐫𑑅𑐩𑐬𑐶, 𑐔𑐟𑐵𑑄𑐩𑐬𑐶, 𑐮𑐵𑐰𑑅𑐮𑐵𑐥𑐷 𑐐𑐧𑑂𑐮𑐾𑑄 𑐣𑐫𑐾𑐩𑐣𑑄 𑑋 𑐖𑑂𑐫𑐵𑐥𑐸 𑐥𑑂𑐫𑐵𑐏𑑄, 𑐮𑐵𑐏𑐾 𑐥𑑂𑐫𑐵𑐏𑑄, 𑐎𑐸𑐩𑐵𑐬𑐷 𑐥𑑂𑐫𑐵𑐏𑑄𑐫𑐵 𑐣𑐵𑑄 𑐣𑑄 𑐐𑐧𑑂𑐮𑐾𑑄 𑐣𑑂𑐫𑑄𑐐𑐸 𑐩𑐡𑐸 𑑋 𑐂𑐩𑐶𑐳𑑄 𑐣 𑐟𑐵𑐫𑑅, 𑐧𑐶𑐖𑐎𑐣𑐶, 𑐮𑐸𑑃𑐳𑑂𑐰𑐵𑑄, 𑐣𑑂𑐫𑐵𑐥𑐸𑐳𑐶𑐏𑑅 𑐐𑐸𑐸𑐸𑐧𑐮𑐾𑑄 𑐳𑑂𑐰𑐫𑐾𑐣𑑄, 𑐣 𑐟 𑐳𑐵𑐫𑐵𑑅 𑐰 𑐫𑐾𑑃𑐫𑐵𑑅 𑐴𑐾 𑐐𑐧𑑂𑐮𑐾𑑄 𑐳𑑂𑐰𑐫𑐾 𑐣𑑄 𑑋 𑐄𑐩𑐶𑐳𑑄 𑐢𑐶𑐩𑐫𑑂‌, 𑐢𑐵𑑅, 𑐡𑐵𑐦𑐏𑐶𑑄, 𑐣𑐐𑐬𑐵, 𑐎𑑂𑐰𑑄𑐔𑐵𑐏𑐶𑑄 𑐰 𑐣𑐵𑐫𑑂‌𑐏𑐶𑑄𑐫𑐵 𑐳𑑅 𑐟𑐎𑑄 𑐐𑐸𑐧𑐮𑐾𑑄 𑐣𑑂𑐫𑐣𑐾𑐣𑑄𑐐𑐸 𑐩𑐡𑐸 𑑋 𑐂𑐩𑐶𑐐𑐸 𑐥𑐸𑐔𑐮𑐫𑑂‌ 𑐠𑑂𑐫𑑄𑐥𑐶𑑄 𑐳𑐸𑑄 𑐕𑐩𑑂𑐴𑐾𑐳𑑂𑐫𑐵𑑄 𑐣𑑄 𑐂𑐥𑐶𑑄 𑐣𑐾𑐰𑐵𑑅𑐟 𑐏𑑅 𑐢𑐵𑐫𑐾𑐐𑐸 𑐕𑐸𑑄 𑐴𑐾 𑐁𑐢𑐵𑐬 𑐏𑑄𑐎𑐾 𑐦𑐂𑐩𑐏𑐸 𑑋 𑐄𑐎𑐶𑑄 𑐠𑑅𑐐𑐸 𑐠𑐵𑐫𑑂‌𑐫𑐵𑐟 𑐂𑐩𑐶𑐳𑑄 𑐦𑐶𑐳𑑅 𑐴𑐾 𑐟𑐵𑐫𑐾𑐎𑐵𑐔𑑂𑐰𑑄𑐐𑐸 𑐏𑑅 𑑋 𑐟𑐬 𑐦𑐶𑐳𑐮𑐫𑑂‌ 𑐣𑑄 𑐳𑑂𑐰𑐵𑑄 𑐴𑑂𑐰𑐫𑐾𑐎𑐾 𑐦𑐂 𑐢𑐂𑐐𑐸 𑐰𑐶𑐱𑑂𑐰𑐵𑐳𑑄 𑐳𑐶𑐎𑑂𑐎𑐶𑐩 𑐣𑐾𑐰𑐵𑑅 𑐐𑐸𑐠𑐶𑑄 𑐠𑑂𑐰 𑐳𑑂𑐎𑐹𑐮 𑐳𑑂𑐰𑐣𑐾𑐐𑐸 𑐱𑐵𑐴𑐳𑐶𑐎 𑐖𑑂𑐫𑐵 𑐫𑐵𑑅𑐐𑐸 𑐏𑑅 𑑋 𑐐𑐸𑐐𑐸 𑐖𑑂𑐫𑐵𑐫𑐵𑐟 𑐣𑐾𑐰𑐵𑑅 𑐡𑐾𑐫𑑂‌ 𑐡𑐧𑐸𑐮𑐶𑑄 𑐩𑐵𑑅𑐐𑐸 𑐟𑐶𑐧𑑅 𑐰 𑐴𑑅𑐥𑐵𑑅 𑐧𑐶𑐮 𑑋

𑐦𑐶𑐳𑐮𑐫𑑂‌ 𑐳𑑂𑐰𑐵𑑄 𑐴𑑂𑐰𑐫𑐾𑐎𑐾 𑐀𑑅𑐥𑐸 𑐩𑐖𑐹 𑑋 𑐳𑑂𑐎𑐹𑐮 𑐥𑐮𑐶𑐳𑑂𑐠𑐵 𑐮𑐶𑐥𑐵 𑐀𑐣 𑐨𑐵𑐫𑑂‌ 𑐰 𑐳𑑄𑐳𑑂𑐎𑐺𑐟𑐶 𑐳𑑂𑐫𑐣𑐾𑐟 𑐥𑑂𑐬𑐱𑐶𑐎𑑂𑐲𑐎𑐟 𑐳𑑂𑐰𑐣𑐶𑐐𑐮𑑄 𑐴𑐾 𑐀𑐣 𑐰𑐣 𑑋 𑐥𑑂𑐬𑐱𑐶𑐎𑑂𑐲𑐎 𑐰 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐟𑐫𑑂‌𑐐𑐸 𑐮𑐐𑐣𑐱𑐷𑐮𑐟𑐵𑑄 𑐠𑑁𑑄 𑐀𑐣𑐫𑐵𑐥𑐶𑑄𑐳𑑄 𑐖𑐶𑐥𑐶𑑄 𑐣𑐾𑐰𑐵𑑅 𑐏𑑅 𑐢𑐎𑐵𑑅 𑐐𑑁𑐬𑐰 𑐳𑐵𑐠 𑐕𑑂𑐫𑑄 𑐢𑐳𑑂𑐰𑐵𑐎𑐾 𑐦𑐸𑐐𑐸 𑐡𑐸 𑑋 𑐠𑑅 𑐣𑐾𑐰𑐵𑑅 𑐖𑐹𑐐𑐸𑐫𑐵 𑐨𑑂𑐫𑐵𑑅 𑐨𑐔𑐵 𑐴𑐾 𑐐𑑁𑐬𑐰 𑐩𑐟𑐵𑑅𑐥𑐶𑑄 𑐰𑐷𑐞𑐵 𑐥𑑂𑐬𑐢𑐵𑐣 𑐠𑐾𑑄𑐖𑑂𑐫𑐵𑑅𑐥𑐶𑑄 𑐠𑑁𑑄 ‘𑐖𑐶 𑐣𑐾𑐰𑐵𑑅 𑐏𑑅’ 𑐢𑐎𑐵𑑅 𑐐𑑁𑐬𑐰𑐵𑐣𑑂𑐰𑐶𑐟 𑐖𑐹𑐐𑐸 𑐡𑐸 𑑋 𑐣𑐾.𑐳𑑄. 𑑑𑑑𑑒𑑐 𑐫𑑂‌ 𑐣𑐶𑐮𑐵 𑐟𑐎 𑐧𑐵𑐖𑑄 𑐰 𑐥𑑂𑐫𑐵𑐏𑑄 𑐳𑑂𑐫𑐣𑐾𑐟 𑐩𑐢𑑂𑐫𑐥𑐸𑐬 𑐎𑐮𑐵 𑐥𑐬𑐶𑐲𑐡𑑂 𑐠𑐶𑐩𑐶𑐫𑐵 𑐎𑐺𑐲𑑂𑐞 𑐧𑐴𑐵𑐡𑐸𑐬 𑐥𑑂𑐬𑐖𑐵𑐥𑐟𑐶, 𑐱𑐣𑑂𑐟𑐎𑐸𑐩𑐵𑐬 𑐥𑑂𑐬𑐖𑐵𑐥𑐟𑐶 𑐰 𑐠𑑂𑐰 𑐗𑑂𑐰𑑅𑐫𑐵 𑐔𑑂𑐰𑐩𑐶 𑐄𑐏𑐾 𑐰𑑄𑐐𑐸 𑐏𑑅 𑑋 𑐨𑐵𑐫𑑂‌ 𑐰 𑐮𑐶𑐥𑐶 𑐳𑑂𑐫𑐣𑐾𑐟 𑐣𑐾𑐥𑐵𑐮 𑐮𑐶𑐥𑐶 𑐐𑐸𑐠𑐶𑐫𑐵 𑐔𑐶𑐣𑐶𑐫𑐵 𑐱𑐵𑐎𑑂𑐫𑐖𑐸 𑐗𑐵𑐫𑐵𑐡𑐷𑐐𑐸 𑐏𑑅 𑑋 𑐣𑐾.𑐳𑑄. 𑑑𑑑𑑒𑑑 𑐫𑑂‌ 𑐴𑐵𑐣𑑄 𑐧𑐵𑐖𑑄 𑐰 𑐥𑑂𑐫𑐵𑐏𑑄𑐫𑐵 𑐣𑐶𑐐𑐹𑐐𑐸 𑐔𑐬𑐞𑐫𑐵 𑐎𑐎𑑂𑐲𑐵𑐫𑐵 𑐮𑐵𑐐𑐶 𑐩𑐢𑑂𑐫𑐥𑐸𑐬 𑐎𑐮𑐵 𑐥𑐬𑐶𑐲𑐡𑑂𑐫𑐵 𑐴𑐾 𑐎𑐺𑐲𑑂𑐞 𑐧𑐴𑐵𑐡𑐸𑐬 𑐥𑑂𑐬𑐖𑐵𑐥𑐟𑐶, 𑐰𑐶𑐲𑑂𑐞𑐸𑐧𑐴𑐵𑐡𑐸𑐬 𑐥𑑂𑐬𑐖𑐵𑐥𑐟𑐶 𑐰 𑐡𑐶𑐮𑐎𑐺𑐲𑑂𑐞 𑐥𑑂𑐬𑐖𑐵𑐥𑐟𑐶𑐥𑐶𑑄 𑐗𑐵𑐫𑐵𑐡𑐷𑐐𑐸 𑐏𑑅 𑑋

𑐳𑑂𑐎𑐹𑐮 𑐄𑐮𑐾𑐖𑑂𑐫𑐵𑐫𑐵 𑐣𑑂𑐴𑐶𑑄𑐣𑐶𑐳𑐾𑑄 𑐴𑐾 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂‌𑐳𑑄 𑐣𑐾𑐰𑐵𑑅 𑐧𑐵𑐖𑑄 𑐰 𑐥𑑂𑐫𑐵𑐏𑐣𑐫𑑂‌ 𑐠𑑅𑐐𑐸 𑐄𑐟𑑂𑐳𑐸𑐎𑐟𑐵 𑐎𑑂𑐫𑐣 𑑋 𑐄𑐎𑐸𑐣𑑂𑐴𑐸 𑐰𑐶𑐡𑑂𑐫𑐵𑐬𑑂𑐠𑐷𑐟𑐳𑐾𑑄 𑐧𑐵𑐖𑑄 𑐐𑐠𑐾 𑐠𑐵𑐫𑐾𑐐𑐸 𑐢𑐎𑐵𑑅 𑐣𑑂𑐫𑑄𑐰𑐮 𑑋 ‘𑐠𑑁𑑄 𑐩𑐏𑐸, 𑐎𑐣𑑂𑐴𑐫𑑂‌𑐣𑐶𑐳𑐾𑑄 𑐕𑐶𑐎𑐥𑐶𑐣𑐶𑐐𑐸 𑐎𑑂𑐮𑐵𑐳 𑐣𑑂𑐴𑑂𑐫𑐵𑐂, 𑐎𑐣𑑂𑐴𑐫𑑂‌𑐣𑐶𑐳𑐾𑑄 𑐴𑐾 𑐳𑐫𑐾𑐎𑐾 𑐎𑐵 𑐩𑐖𑑂𑐫𑐹𑐮𑐵 ? 𑐠𑑁𑑄 𑐮𑐵 𑐣𑐵𑐳𑑅 𑐥𑐸𑐖𑐵 𑐖𑐎 …. ’ 𑐏𑑃 𑐟𑑂𑐰𑐵𑑅 𑐥𑐹𑐩𑐰𑑄 𑐧𑐮𑐫𑑂‌ 𑐴𑐾 𑐕𑐩𑑂𑐴𑐾𑐳𑑂𑐫𑐵𑑄 𑐢𑐵𑐮, ‘𑐩𑐏𑐸 𑐳𑐬, 𑐎𑐣𑑂𑐴𑐫𑑂‌𑐣𑐶𑐳𑐾𑑄 𑐮𑐵 𑐎𑑂𑐮𑐵𑐳 𑐖𑐸𑐂 𑐀𑐫𑑂‌𑐳𑐵𑑄 𑐕𑐸𑑄 𑐨𑐔𑐵 𑐳𑐵𑑄 𑐳𑐫𑐾𑐎𑐾 𑐢𑐎𑐵𑑅 𑐎𑐵 𑑋’ 𑐄𑐎𑐸𑐣𑑂𑐴𑐸 𑐰𑐫𑐵𑐟 𑐢𑐶𑐩𑐫𑑂‌ 𑐣𑑂𑐴𑑂𑐫𑑅𑐣𑐾 𑐟𑐫𑐵𑑅 ‘𑐟𑐵𑐏𑑀𑐟𑐵 𑐡𑑂𑐫𑐵𑑄𑐡𑑂𑐫𑐵𑑄’𑐫𑐵 𑐧𑑀𑐮 𑐠𑐵𑐫𑐾𑐐𑐸 𑐳𑑂𑐫𑐣𑐵 𑑋 𑐰𑑄 ‘𑐟𑐵𑐏𑑀𑐟𑐵 𑐡𑑂𑐫𑐵𑑄𑐡𑑂𑐫𑐵𑑄, 𑐟𑐵𑐟𑐵𑐏𑑀𑐟𑐵 𑐡𑑂𑐫𑐵𑑄𑐡𑑂𑐫𑐵𑑄’ 𑐢𑐎𑐵𑑅 𑐩𑐡𑐶𑐎𑑂𑐎 𑐴𑐵𑐴𑐵𑑄 𑐢𑐶𑐩𑐫𑑂‌ 𑐠𑐵𑐫𑐾𑐐𑐸 𑐎𑐸𑐟𑑅 𑐫𑐵𑐣𑐵𑐔𑑂𑐰𑐣 𑑋 𑐳𑐵𑐟𑐶𑐎𑐸𑐣𑑂𑐴𑐸𑐣𑐶𑐳𑐾𑑄 𑐖𑐹𑐐𑐸 𑐎𑑂𑐮𑐵𑐳𑐫𑑂‌ 𑐣𑑄 𑐄𑐩𑐶𑐳𑑄 𑐄𑐮𑐶 𑐴𑐾 𑐎𑐸𑐟𑑅 𑐫𑐵𑐣𑐵𑑅 𑐧𑐵𑐖𑑄 𑐰 𑐥𑑂𑐫𑐵𑐏𑑄 𑐳𑐫𑐾𑐎𑐮 𑑋

𑐳𑐣𑑂 𑑒𑑐𑑐𑑐 𑐫 𑐣𑐾𑐰𑐵𑑅 𑐨𑐵𑐫𑑂 𑐰 𑐳𑑄𑐳𑑂𑐎𑐺𑐟𑐶 𑐧𑑂𑐰𑐣𑐾𑐎𑐸𑐠𑐶𑐂 𑐢𑐶𑐩𑐫𑑂 𑐧𑐵𑐖𑑄 𑐳𑑂𑐫𑐣𑐾𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸
(𑐎𑐶𑐥𑐵 – 𑐳𑐣𑑂 𑑒𑑐𑑐𑑐 𑐫 𑐣𑐾𑐰𑐵𑑅 𑐨𑐵𑐫𑑂 𑐰 𑐳𑑄𑐳𑑂𑐎𑐺𑐟𑐶 𑐧𑑂𑐰𑐣𑐾𑐎𑐸𑐠𑐶𑐂 𑐢𑐶𑐩𑐫𑑂 𑐧𑐵𑐖𑑄 𑐳𑑂𑐫𑐣𑐾𑐖𑑂𑐫𑐵 𑐖𑐸𑐫𑐵𑐔𑑂𑐰𑑄𑐐𑐸)
𑐳𑐸𑐠𑐫𑑂‌ 𑑑𑑐 𑐧𑐖𑐾𑐣𑐶𑐳𑐾𑑄 𑐳𑐣𑐶𑐮𑐫𑐵 𑑔 𑐧𑐖𑐾 𑐟𑐎 𑐂𑐩𑐶𑐐𑐸 𑐳𑑂𑐎𑐹𑐮 𑐃 𑐏𑑅𑑋 𑐠𑑂𑐰 𑐂𑐮𑐫𑑂‌ 𑐨𑐵𑐫𑑂‌, 𑐮𑐶𑐥𑐶, 𑐧𑐵𑐖𑑄 𑐰 𑐥𑑂𑐫𑐵𑐏𑑄 𑐦𑐸𑐎𑐫𑐵𑐐𑐸 𑐣𑑄 𑐎𑑂𑐮𑐵𑐳 𑐥𑐵𑐮𑑄𑐥𑐵𑑅 𑐖𑐸𑐂 𑑋 𑐡𑐠𑐸𑐂 𑐑𑑁𑐕𑐶𑐫𑐵 𑐧𑐖𑐶 𑐣𑐫𑐾𑐐𑐸 𑐧𑑂𑐬𑐾𑐎 𑐖𑐸𑐂 𑑋 𑐰𑐶𑐡𑑂𑐫𑐵𑐬𑑂𑐠𑐷𑐟 𑐢𑐵𑑅𑐳𑐵 𑐧𑑂𑐬𑐾𑐎𑐫𑑂‌ 𑐣𑑄 𑐄𑐮𑐶 𑐴𑐾 𑐀𑐨𑑂𑐫𑐵𑐳 𑐫𑐵𑐣𑐵𑐔𑑂𑐰𑐣𑐷 𑑋 𑐣𑑂𑐴𑐶𑐔𑑂𑐕𑐶 𑐳𑑂𑐎𑐹𑐮𑐫𑑂‌ 𑐔𑑂𑐰𑐣𑐾 𑐢𑐸𑑄𑐎𑐵𑑅 𑐠𑑅𑐐𑐸 𑐕𑐾𑑃𑐫𑑂‌ 𑐳𑐸𑐡𑑂𑐢𑐵 𑐥𑐵𑐮𑑄𑐥𑐵𑑅 𑐧𑐵𑐖𑑄 𑐫𑑄𑐎𑐵𑑅 𑐳𑐸𑐠𑐫𑑂‌ 𑐰 𑐧𑐴𑐣𑐷 𑐧𑐵𑐖𑑄 𑐠𑐵𑐫𑐾𑐐𑐸 𑐀𑐨𑑂𑐫𑐵𑐳 𑐫𑐵𑐂 𑑋 𑐖𑐶𑐥𑐶𑑄 𑐔𑑂𑐰𑐣𑐵𑐐𑐸 𑐕𑐾𑑃𑐫𑐵 𑐰𑐶𑐬𑐾𑐣𑑂𑐡𑑂𑐬 𑐥𑑂𑐬𑐢𑐵𑐣 𑐧𑐴𑐣𑐷 𑐕𑐾𑑃𑐫𑐵 𑐩𑐾𑐥𑐶𑑄 𑐳𑐎𑐮𑐾𑑄 𑐚𑐶𑐨𑐷 𑐳𑑂𑐰𑐫𑐵𑐔𑑂𑐰𑑄𑐳𑐵𑑄 𑐫𑐵𑐎𑑅𑐔𑐵 𑐎𑑂𑐰𑐠𑐵𑐫𑑂‌ 𑐔𑑂𑐰𑐣𑐵𑑅 𑐢𑐶𑐩𑐫𑑂‌ 𑐠𑐵𑐫𑐾𑐐𑐸 𑐀𑐨𑑂𑐫𑐵𑐳 𑐫𑐵𑐣𑐵𑐔𑑂𑐰𑐣𑐷 𑑋 𑐖𑐶𑐥𑐶𑑄 𑐮𑐶𑐴𑐵𑑄 𑐰𑐫𑐾 𑐕𑐣𑑂𑐴𑐸 𑐣𑑂𑐴𑑂𑐫𑐰 𑐕𑐩𑑂𑐴 𑐰𑐶𑐡𑑂𑐫𑐵𑐬𑑂𑐠𑐷 𑐰𑐶𑐐𑐾𑐣 𑐥𑑂𑐬𑐢𑐵𑐣𑑄 ‘𑐳𑐬𑐥𑐶𑑄 𑐎𑐣𑑂𑐴𑐫𑑂‌ 𑐮𑐶𑐴𑐵𑑄 𑐗𑐵𑐂, 𑐠𑑁𑑄 𑐧𑐵𑐖𑑄𑐫𑐵 𑐥𑑂𑐫𑑄𑐐𑐹 𑐣𑑂𑐫𑐵𑐐𑐹 𑐟𑐵𑐮 𑐔𑑂𑐰𑐫𑐵 𑐧𑐶𑐫𑐵𑐡𑐶𑐳𑑃, 𑐖𑐶𑐩𑐶𑐳𑑄 𑐮𑐶𑐥𑐵 𑐠𑐣 𑐳𑑂𑐎𑐹𑐮𑐫𑑂‌ 𑐰𑐫𑐵𑑅 𑐀𑐨𑑂𑐫𑐵𑐳 𑐫𑐵𑐣𑐵𑐔𑑂𑐰𑐣𑐾’ 𑐢𑐎𑐵𑑅 𑐧𑐵𑐖𑑄𑐫𑐵 𑐧𑑀𑐮𑐟 𑐔𑑂𑐰𑐎𑐵𑐎𑐵𑐮 𑑋 𑐣𑐶𑐮𑐵𑐫𑐵 𑐩𑑂𑐴𑑀𑐔𑐵 𑐂𑐮𑐫𑑂‌ 𑐴𑐾 𑐖𑐶𑐩𑐶𑐳𑑄 𑐩𑐟𑐶𑐂 𑐩𑐟𑐫𑐵 𑐎𑐠𑑄 𑐂𑐩𑐶𑐳𑑄 𑐖𑑂𑐫𑐵𑐥𑐸 𑐥𑑂𑐫𑐵𑐏𑑄, 𑐮𑐵𑐏𑐾 𑐥𑑂𑐫𑐵𑐏𑑄 𑐰 𑐩𑐴𑐵𑐎𑐵𑐮𑐷 𑐥𑑂𑐫𑐵𑐏𑑄 𑐀𑐮𑐾 𑐢𑐶𑐩𑐾, 𑐢𑐵𑑅 𑐰 𑐥𑐔𑑂𑐕𑐶𑐩𑐵𑐫𑐵 𑐫𑐎𑑂𑐰 𑐟𑐵𑐮𑐟 𑐠𑐵𑐫𑐾 𑐳𑐫𑐾𑐎𑐮 𑑋

𑐠𑐸𑐥𑐶𑑄 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂‌𑐟 𑐳𑑂𑐫𑐣𑐾𑐐𑐸 𑐰 𑐔𑑂𑐰𑐣𑐾𑐐𑐸 𑐠𑐵𑐫𑑂‌ 𑐡𑐎𑑂𑐰 𑐳𑐶𑐎𑑂𑐎𑐶𑐩 𑐣𑐾𑐰𑐵𑑅 𑐐𑐸𑐠𑐶𑐫𑐵 𑐴𑐵𑐩𑐵 𑐢𑐬𑑂𑐩 𑐥𑑂𑐬𑐢𑐵𑐣𑐖𑐸𑑄 𑐠𑑅𑐐𑐸 𑐴𑐾 𑐕𑐾𑑃𑐫𑑂‌ 𑐄𑐥𑐮𑐰𑑂𑐢 𑐫𑐵𑐣𑐵𑐡𑐷𑐐𑐸 𑐏𑑅 𑑋 𑐰𑐫𑑂‌𑐎𑑅𑐫𑐵 𑐴𑐾 𑐕𑐾𑑃𑐫𑑂‌ 𑐳𑑂𑐎𑐹𑐮 𑐔𑐵𑐫𑐾𑐎𑐵𑐟𑑅𑐐𑐸 𑐏𑑅 𑑋 𑐀𑐣 𑐴𑐾 𑐰𑐶𑐡𑑂𑐫𑐵𑐬𑑂𑐠𑐷𑐟 𑐔𑑂𑐰𑐣𑐷𑐐𑐸 𑐴𑑀𑐳𑑂𑐚𑐾𑐮 𑐣𑑄 𑐡𑐫𑐾𑐎𑐵𑐟𑑅𑐐𑐸 𑐡𑐸 𑑋 𑐰𑐫𑑂‌𑐎𑑅 𑐢𑐬𑑂𑐩 𑐥𑑂𑐬𑐢𑐵𑐣𑐫𑐵 𑐟𑐶𑐬𑐶 𑐩𑐫𑑂‌𑐖𑐸 𑐡𑐸𑐬𑑂𑐐𑐵𑐡𑐾𑐰𑐷 𑐥𑑂𑐬𑐢𑐵𑐣 𑐄𑐐𑐸 𑐳𑑂𑐎𑐹𑐮𑐫𑐵 𑐥𑑂𑐬𑐶𑐣𑑂𑐳𑐶𑐥𑐮 𑐏𑑅 𑑋 𑐰𑐫𑑂‌𑐎𑑅 𑐫𑐾𑑃𑐣𑑄 𑐄𑐏𑐾 𑐂𑐴𑐶𑐥𑐵 𑐫𑐵𑐣𑐵𑑅 𑐗𑐵𑑅𑐐𑐸 𑐏𑑅 𑑋 𑐰𑐫𑑂‌𑐎𑐮𑑄 𑐀𑐣 𑐣𑐾𑐰𑐵𑑅 𑐨𑐵𑐫𑑂‌𑐫𑐵 𑐎𑑂𑐮𑐵𑐳 𑐣𑑄 𑐎𑐫𑐵𑐡𑐷 𑑋 𑐰𑐫𑑂‌𑐎𑑅𑐫𑐵 𑐂𑐔𑑂𑐕𑐵 𑐡𑐸 𑐰 𑐳𑑂𑐎𑐹𑐮 𑐮𑐶𑐥𑐵 𑐕𑐐𑐹 𑐰𑐶𑐱𑑂𑐰𑐰𑐶𑐡𑑂𑐫𑐵𑐮𑐫 (𑐫𑐹𑐣𑐶𑐨𑐬𑑂𑐳𑐶𑐚𑐷) 𑐫𑐵 𑐬𑐸𑐥𑐫𑑂‌ 𑐰𑐶𑐎𑐳𑐶𑐟 𑐖𑐸𑐂 𑐦𑐫𑐾𑐩𑐵 𑑋 𑐰 𑐳𑑂𑐎𑐹𑐮𑐫𑑂‌ 𑐩𑐾𑐩𑐾𑐐𑐸 𑐰𑐶𑐲𑐫𑐫𑐵 𑐎𑑂𑐮𑐵𑐳 𑐣𑑄 𑐣𑑂𑐴𑑂𑐫𑐵𑐎𑐾𑐐𑐸 𑐰 𑐬𑑀𑐖𑐐𑐵𑐬𑐷𑐩𑐹𑐮𑐎 𑐟𑐵𑐮𑐶𑐩 𑐧𑐶𑐫𑐵𑑅 𑐀𑐣𑐫𑐵𑐥𑐶𑐣𑐶𑐐𑐸 𑐱𑐷𑐥 𑐰𑐶𑐎𑐳𑐶𑐟 𑐫𑐵𑐫𑐾𑐐𑐸 𑐏𑑃𑐫𑑂‌ 𑐰𑐫𑑂‌𑐎𑐮𑑄 𑐧𑐬𑑀𑐧𑐬 𑐴𑐾 𑐏𑑃 𑐮𑑂𑐴𑐵𑐣𑐵𑐡𑐷 𑑋 𑐠𑑂𑐰 𑐳𑑂𑐎𑐹𑐮 𑐠𑐠𑐾 𑐍𑐥𑐔𑐵𑐬𑐶𑐎 𑐬𑐸𑐥𑑄 𑐔𑐵𑐫𑐾𑐎𑐾 𑐣𑑂𑐴𑑂𑐫𑑅 𑐣𑑄 𑐰𑐫𑑂‌𑐎𑐮𑑄 𑐀𑐣𑐫𑐵𑐥𑐶𑑄 𑐩𑐣𑐹𑐟 𑐩𑐸𑑄𑐎𑐵𑑅 𑐣𑐾𑐰𑐵𑑅 𑐨𑐵𑐫𑑂‌ 𑐰 𑐥𑑂𑐫𑐵𑐏𑑄 𑐳𑑂𑐫𑐣𑐾𑐐𑐸 𑐫𑐵𑐣𑐵 𑐔𑑂𑐰𑐣𑐵𑐡𑐷𑐐𑐸 𑐖𑐸𑐫𑐵𑐔𑑂𑐰𑐣 𑑋

𑐳𑐣𑑂 𑑑𑑙𑑙𑑓 𑐣𑐶𑐳𑐾𑑄 𑐳𑐶𑐎𑑂𑐎𑐶𑐩𑐫𑑂‌ 𑐣𑐾𑐰𑐵𑑅𑐟𑐫𑑂‌𑐟 𑐳𑑄𑐐𑐛𑐶𑐟 𑐫𑐵𑐫𑐾𑐟 𑐖𑑂𑐫𑐵 𑐳𑐣𑐵𑐔𑑂𑐰𑑄𑐐𑐸 𑐳𑐶𑐎𑑂𑐎𑐶𑐩 𑐣𑐾𑐰𑐵𑑅 𑐐𑐸𑐠𑐶𑐫𑐵 𑐎𑐸𑐟𑐮𑑄 𑐠𑐸𑐐𑐸 𑐳𑑂𑐎𑐹𑐮 𑐔𑐵𑐫𑐾𑐎𑐾𑐦𑐸𑐐𑐸 𑐏𑑅 𑑋 𑐳𑐣𑑂 𑑑𑑙𑑙𑑓 𑐫𑑂‌ 𑐣𑐷𑐳𑑂𑐰𑑄𑐐𑐸 𑐳𑐶𑐎𑑂𑐎𑐶𑐩 𑐣𑐾𑐰𑐵𑑅 𑐐𑐸𑐠𑐶 𑐰 𑐳𑐣𑑂 𑑑𑑙𑑙𑑖 𑐫𑑂‌ 𑐣𑐷𑐳𑑂𑐰𑑄𑐐𑐸 𑐳𑐶𑐎𑑂𑐎𑐶𑐩 (𑐨𑐵𑐬𑐟𑐷𑐫) 𑐣𑐾𑐰𑐵𑑅 𑐳𑑄𑐐𑐛𑐣 𑐣𑐶𑐐𑐹 𑐥𑐸𑐔𑑅𑐫𑐵𑐟 𑑑𑑙𑑙𑑙𑐫𑑂‌ 𑐕𑐐𑐹 𑐫𑐵𑐣𑐵𑑅 𑐳𑐶𑐎𑑂𑐎𑐶𑐩 𑐣𑐾𑐰𑐵𑑅 𑐐𑐸𑐠𑐶 𑐴𑐾 𑐣𑐵𑑄 𑐟𑐫𑐵𑑅 𑐐𑐸𑐠𑐶 𑐳𑑂𑐰𑑄𑐐𑐸 𑐏𑑅 𑑋 𑐐𑐸𑐠𑐶𑐫𑐵 𑐣𑐵𑐫𑑅 𑐏𑐐𑐾𑐣𑑂𑐡𑑂𑐬 𑐥𑑂𑐬𑐢𑐵𑐣𑑄 𑐠𑑅𑐐𑐸 𑐧𑑂𑐫𑐵𑐎𑑂𑐎 𑐃 𑐰 𑐥𑐬𑐶𑐱𑑂𑐬𑐩 𑐴𑐾 𑐠𑑂𑐰 𑐳𑑂𑐎𑐹𑐮 𑐰 𑐳𑐶𑐎𑑂𑐎𑐶𑐩 𑐣𑐾𑐰𑐵𑑅 𑐐𑐸𑐠𑐶𑐫𑐵𑐟 𑐦𑑂𑐫𑐵𑐣𑐵 𑐔𑑂𑐰𑐣𑐵𑐡𑐷𑐐𑐸 𑐡𑐸 𑑋 𑐰𑐫𑑂‌𑐎𑑅𑐫𑐵 𑐴𑐾 𑐣𑐾𑐟𑐺𑐟𑑂𑐰𑐫𑑂‌ 𑐳𑑂𑐎𑐹𑐮𑐫𑐵 𑐰𑐶𑐡𑑂𑐫𑐵𑐬𑑂𑐠𑐷𑐟𑐫𑑂‌𑐳𑑄 𑐳𑐶𑐎𑑂𑐎𑐶𑐩𑐫𑐵 𑐡𑐾𑐣𑑂𑐟𑐵𑐩, 𑐐𑐾𑐖𑐶𑐒, 𑐥𑐾𑐮𑐶𑐒, 𑐬𑑄𑐐𑐾𑐮𑐷, 𑐬𑐩𑑂𑐦𑐹, 𑐬𑐶𑐣𑐵𑐎, 𑐳𑐡𑐵𑐩 𑐰 𑐩𑐾𑐩𑐾𑐐𑐸 𑐣𑐾𑐰𑐵𑑅 𑐧𑐳𑑂𑐟𑐷𑐂 𑐣𑑄 𑐣𑐾𑐰𑐵𑑅 𑐳𑐵𑑄𑐳𑑂𑐎𑐺𑐟𑐶𑐎 𑐖𑑂𑐫𑐵𑐗𑑂𑐰𑑅 𑐣𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅 𑑋

𑐠𑑂𑐰𑐴𑐾 𑐳𑐶𑐎𑑂𑐎𑐶𑐩 𑐣𑐾𑐰𑐵𑑅 𑐐𑐸𑐠𑐶𑑄 𑐣𑑂𑐴𑐵𑐥𑐵 ‘𑐣𑐾𑐰𑐵𑑅’ 𑐢𑐵𑑅𑐐𑐸 𑐥𑐟𑑂𑐬𑐶𑐎𑐵 𑐣𑑄 𑐥𑐶𑐎𑐫𑐵𑐔𑑂𑐰𑑄𑐐𑐸 𑐏𑑅 𑑋 𑐄𑐎𑐷 𑐕𑐠𑐵𑐫𑑂‌ 𑐔𑑂𑐰𑐫𑐵𑐟𑑅𑐐𑐸 𑐏𑑅 ‘𑐴𑐵𑐩𑐷 𑐣𑐾𑐰𑐵𑑅, 𑐴𑐵𑐩𑑂𑐬𑑀 𑐨𑐵𑐲𑐵 𑐣𑐾𑐰𑐵𑑅, 𑐴𑐵𑐩𑑂𑐬𑑀 𑐳𑑄𑐳𑑂𑐎𑐺𑐟𑐶 𑐣𑐾𑐰𑐵𑑅’ 𑑋 𑐁𑑅 𑐰𑐫𑐵𑑅 𑐂𑐩𑐶𑐳𑑄 𑐥𑐟𑑂𑐬𑐶𑐎𑐵 𑐥𑐶𑐎𑐵𑑅𑐳𑐵 𑐩𑑂𑐴𑑀𑐟𑐶𑑄 𑐣𑑄 ‘𑐗𑐷 𑐣𑐾𑐰𑐵𑑅, 𑐗𑐷𑐐𑐸 𑐨𑐵𑐫𑑂‌ 𑐣𑐾𑐰𑐵𑑅, 𑐗𑐷𑐐𑐸 𑐟𑐖𑐶𑐮𑐖𑐶 𑐣𑐾𑐰𑐵𑑅’ 𑐢𑐎𑐵𑑅 𑐔𑑂𑐰𑐫𑐾 𑐦𑐫𑐾𑐢𑐸𑑄𑐎𑐮 𑑋 𑐀𑐗 𑐥𑐟𑑂𑐬𑐶𑐎𑐵𑐫𑑂‌ 𑐖𑐎 𑐳𑐷𑐩𑐶𑐟 𑐩𑐖𑐸𑐳𑐾 𑐠𑑅𑐐𑐸 𑐩𑑂𑐴𑐳𑐷𑐎𑐵 𑐧𑐵𑐖𑑄 𑐰 𑐥𑑂𑐫𑐵𑐏𑐣𑑄 𑐥𑑂𑐰𑑄𑐎𑐾 𑐦𑐫𑐾𑐢𑐸𑑄𑐎𑐮 𑑋 𑐳𑐶𑐎𑑂𑐎𑐶𑐩𑐫𑐵 𑐢𑐶𑐩𑐫𑑂‌𑐫𑐵 ‘𑐟𑐵𑐏𑑀𑐟𑐵 𑐡𑑂𑐫𑐵𑑄𑐡𑑂𑐫𑐵𑑄’ 𑐳𑐮𑑄 𑐳𑑂𑐰𑐣𑐶𑐐𑑅𑐫𑐵 𑐣𑐾𑐰𑐵𑑅𑐟 𑐣𑑂𑐴𑑂𑐫𑐮𑑄 𑐔𑐵𑐫𑐾𑐩𑐵𑑅𑐐𑐸 𑐃 𑐣𑑄 𑐰𑐫𑐾𑐢𑐸𑑄𑐎𑐮 𑑋

𑐔𑑂𑐰𑐫𑑂‌𑐫𑐵 𑐎𑐶𑐥𑐵 – 𑐧𑑂𑐰𑐣𑐾𑐎𑐸𑐠𑐶 𑐥𑐮𑐶𑐳𑑂𑐠𑐵 𑐖𑐹𑐐𑐸 𑑑𑑖 𑐡𑑃 𑐮𑐶𑐥𑐵 𑐳𑐶𑐎𑑂𑐎𑐶𑐩𑐫𑑂 𑐖𑐹𑐐𑐸 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷 𑐥𑑂𑐬𑐱𑐶𑐎𑑂𑐲𑐞 𑐖𑑂𑐫𑐵𑐗𑑂𑐰𑐮𑐫𑑂 𑐔𑑂𑐰𑐩𑐶 𑐰 𑐣𑑂𑐴𑐵𑐥𑐵𑐫𑐵 𑐧𑑂𑐰𑐣𑐵𑐩𑐶𑐥𑐶𑑄
𑐣𑑂𑐴𑐵𑐥𑐵𑑄 𑐥𑐶𑐡𑑄𑐐𑐸 – 𑐳𑐣𑑂𑐢𑑂𑐫𑐵 𑐚𑐵𑐂𑐩𑑂𑐳 𑐡𑑃 𑑖 𑐮𑑂𑐫𑐵𑑅 𑑑𑑑𑑕, 𑐣𑐾. 𑐳𑑄. 𑑑𑑑𑑒𑑑 𑐔𑐶𑐮𑑂𑐮𑐵𑐐𑐵 𑑗 , 𑐔𑐿𑐟𑑂𑐬 𑑓 𑐱𑐸𑐎𑑂𑐬𑐰𑐵𑑅 𑑒𑑐𑑕𑑗 ,𑐩𑐵𑐬𑑂𑐔 𑑑𑑖 𑑒𑑐𑑐𑑑