𑐳𑐸𑐬𑑂𑐏𑐾𑐟𑐫𑑂 𑐢𑐶𑐩𑐾 𑐥𑑂𑐬𑐱𑐶𑐎𑑂𑐲𑐞 𑐎𑑂𑐰𑐔𑐵𑐮

𑐎𑐬𑑂𑐞𑐵𑐮𑐷 𑐥𑑂𑐬𑐡𑐾𑐱𑐫𑐵 𑐬𑐵𑐖𑐢𑐵𑐣𑐷 𑐳𑐸𑐬𑑂𑐏𑐾𑐟𑐫𑐵 𑐰𑐷𑐬𑐾𑐣𑑂𑐡𑑂𑐬𑐣𑐐𑐬𑐫𑑂 𑐣𑑂𑐴𑑂𑐫𑐵𑐣𑐵𑐔𑑂𑐰𑑄𑐐𑐸 𑐴𑐸𑐮𑐵𑐥𑑂𑐫𑐵𑐏𑑄 𑐰 𑐢𑐶𑐩𑐾 𑐥𑑂𑐬𑐱𑐶𑐎𑑂𑐲𑐞 𑐎𑑂𑐰𑐔𑐵𑑅𑐐𑐸 𑐡𑐸 𑑋 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹 𑐳𑐸𑐬𑑂𑐏𑐾𑐟 𑐖𑐶𑐮𑑂𑐮𑐵 𑐳𑐩𑐶𑐟𑐶𑐫𑐵 𑐐𑑂𑐰𑐳𑐵𑐮𑐫𑑂 𑐱𑐶𑐎𑑂𑐲𑐵 𑐰𑐶𑐎𑐵𑐳 𑐣𑐶𑐬𑑂𑐡𑐾𑐱𑐣𑐵𑐮𑐫 𑐎𑐬𑑂𑐞𑐵𑐮𑐷 𑐥𑑂𑐬𑐡𑐾𑐱𑐫𑐵 𑐐𑑂𑐰𑐵𑐴𑐵𑐮𑐶𑐂 𑐣𑐷𑐣𑑂𑐴𑐸𑐫𑐵 𑐄𑐐𑐸 𑐥𑑂𑐬𑐱𑐶𑐎𑑂𑐲𑐞 𑐖𑐹𑐐𑐸 𑐏𑑅 𑑋

𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑐮𑐫𑑂 𑐩𑐹𑐥𑐵𑐴𑐵𑑄𑐎𑐠𑑄 𑐗𑐵𑐫𑐵𑐡𑐷𑐩𑑂𑐴 𑐎𑐬𑑂𑐞𑐵𑐮𑐷 𑐥𑑂𑐬𑐡𑐾𑐱𑐫𑐵 𑐳𑐵𑐩𑐵𑐖𑐶𑐎 𑐰𑐶𑐎𑐵𑐳 𑐩𑐣𑑂𑐟𑑂𑐬𑐷 𑐏𑐜𑑂𑐐𑐧𑐴𑐵𑐡𑐸𑐬 𑐥𑑀𑐏𑐬𑐾𑐮𑑄 𑐡𑐾𑐫𑑂𑐫𑐵 𑐎𑐮𑐵, 𑐳𑑄𑐳𑑂𑐎𑐺𑐟𑐶 𑐮𑑂𑐫𑑄𑐎𑐵 𑐟𑐫𑐾𑐐𑐸 𑐖𑑂𑐫𑐵𑐫𑑂 𑐣𑐾𑐰𑐵𑑅 𑐳𑐩𑐸𑐡𑐵𑐫𑐫𑐵 𑐩𑐴𑐟𑑂𑐰𑐥𑐹𑐬𑑂𑐞 𑐨𑐹𑐩𑐶𑐎𑐵 𑐡𑐸 𑐢𑐫𑐵𑐡𑐶𑐮 𑑋 𑐩𑐣𑑂𑐟𑑂𑐬𑐷 𑐥𑑀𑐏𑐬𑐾𑐮𑑄 𑐳𑑂𑐰𑐣𑐶𑐐𑑅 𑐥𑐶𑐣𑐾 𑐔𑑂𑐰𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅 𑐳𑐩𑐸𑐡𑐵𑐫 𑐣𑑄 𑐠𑑅𑐐𑐸 𑐨𑐵𑐲𑐵, 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵𑐟 𑐖𑐷𑐰𑐣𑑂𑐟 𑐫𑐵𑐣𑐵𑐟𑐫𑐾𑐐𑐸 𑐰 𑐄𑐎𑐶𑐫𑐵 𑐳𑑄𑐬𑐎𑑂𑐲𑐞, 𑐳𑑄𑐰𑐡𑑂𑐬𑑂𑐢𑐣 𑐰 𑐥𑑂𑐬𑐰𑐡𑑂𑐬𑑂𑐢𑐣𑐫𑐵 𑐣𑐶𑑄𑐟𑐶𑑄 𑐣𑑂𑐴𑑂𑐫𑐔𑐶𑐮𑐵𑐔𑑂𑐰𑑄𑐐𑐸 𑐡𑐸 𑐢𑐵𑐳𑐾𑑄 𑐎𑐬𑑂𑐞𑐵𑐮𑐷 𑐥𑑂𑐬𑐡𑐾𑐱𑐫𑐵 𑐴𑐎𑐫𑑂 𑐣𑐾𑐰𑐵𑑅 𑐎𑐮𑐵, 𑐳𑑄𑐳𑑂𑐎𑐺𑐟𑐶𑐫𑐵 𑐄𑐟𑑂𑐠𑐵𑐣 𑐰 𑐥𑑂𑐬𑐰𑐡𑑂𑐬𑑂𑐢𑐣𑐫𑐵 𑐣𑐶𑑄𑐟𑐶𑑄 𑐐𑑂𑐰𑐵𑐴𑐵𑐮𑐶 𑐫𑐵𑐫𑐾𑐟 𑐠𑑅 𑐣𑑂𑐴𑑂𑐫𑐵𑐧𑐮𑐾𑑄 𑐟𑐫𑐵𑐬 𑐡𑐸 𑐢𑐫𑐵𑐡𑐶𑐮 𑑋
𑐣𑐶𑐬𑑂𑐡𑐾𑐱𑐣𑐵𑐮𑐫𑐫𑐵 𑐎𑐬𑑂𑐞𑐵𑐮𑐷 𑐥𑑂𑐬𑐡𑐾𑐱𑐫𑐵 𑐱𑐵𑐏𑐵 𑐀𑐢𑐶𑐎𑐺𑐟 𑐗𑐮𑐎𑐥𑑂𑐬𑐳𑐵𑐡 𑐎𑑀𑐂𑐬𑐵𑐮𑐵𑑄 𑐣𑐶𑐬𑑂𑐡𑐾𑐱𑐣𑐵𑐮𑐫𑑄 𑐧𑐶𑐄𑐐𑐸 𑐳𑐷𑐩𑐶𑐟 𑐧𑐖𑐾𑐚 𑐡𑐸𑐣𑐾 𑐔𑑂𑐰𑐣𑐵𑑅 𑐣𑑄 𑐩𑐴𑐟𑑂𑐰𑐥𑐹𑐬𑑂𑐞 𑐥𑑂𑐬𑐱𑐶𑐎𑑂𑐲𑐞 𑐎𑑂𑐰𑐔𑐵𑐫𑐾𑐎𑐹𑐐𑐸 𑐏𑑃𑐫𑑂 𑐮𑐳𑐟𑐵 𑐥𑑂𑐰𑑄𑐎𑐵𑐡𑐶𑐮 𑑋

𑐥𑑂𑐬𑐱𑐶𑐎𑑂𑐲𑐎 𑐳𑐸𑐡𑐣 𑐩𑐸𑐣𑐶𑐎𑐵𑐬𑑄 𑐳𑐸𑐬𑑂𑐏𑐾𑐟𑐫𑐵 𑐣𑐾𑐰𑐵𑑅𑐟𑐫𑑂𑐳𑑄 𑐥𑑂𑐬𑐱𑐶𑐎𑑂𑐲𑐞 𑐀𑐰𑐢𑐶𑐖𑑂𑐰𑑅𑐕𑐶 𑐣𑐷𑐣𑑂𑐴𑐸𑐟𑐎 𑐟𑐳𑐎𑑄 𑐮𑐐𑐵𑐰 𑐧𑐶𑐫𑐵𑑅 𑐥𑑂𑐬𑐱𑐶𑐎𑑂𑐲𑐞 𑐎𑐵𑑅𑐐𑐸 𑐢𑐵𑐳𑐾𑑄 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐟𑐫𑑂𑐎𑐾 𑐏𑐣𑐾 𑐡𑐸𑐐𑐸 𑐮𑐐𑐵𑐰𑑄 𑐠𑑅𑐀𑐟𑐶𑐎𑑄 𑐥𑑂𑐬𑐨𑐵𑐰𑐶𑐟 𑐖𑐹𑐐𑐸 𑐏𑑃 𑐎𑐣𑐵𑐡𑐶𑐮 𑑋

𑐖𑑂𑐫𑐵𑐗𑑂𑐰𑐮𑐫𑑂 𑐣𑐾𑐰𑐵𑑅 𑐡𑐾𑐫𑑂 𑐡𑐧𑐹𑐫𑐵 𑐎𑐾𑐣𑑂𑐡𑑂𑐬𑐷𑐫 𑐣𑑂𑐰𑐎𑐸 𑐏𑐐𑐾𑐣𑑂𑐡𑑂𑐬 𑐱𑑂𑐬𑐾𑐲𑑂𑐛, 𑐣𑐾𑐥𑐵𑐮 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐩𑐴𑐵𑐳𑑄𑐑 𑐳𑐸𑐬𑑂𑐏𑐾𑐟𑐫𑐵 𑐎𑐵𑐬𑑂𑐫𑐰𑐵𑐴𑐎 𑐀𑐢𑑂𑐫𑐎𑑂𑐲 𑐀𑐱𑑀𑐎 𑐬𑐵𑐖𑐷, 𑐁𑐡𑐶𑐰𑐵𑐳𑐷 𑐖𑐣𑐖𑐵𑐟𑐶 𑐩𑐴𑐶𑐮𑐵 𑐩𑐴𑐵𑐳𑑄𑐑 𑐳𑐸𑐬𑑂𑐏𑐾𑐟𑐫𑐵 𑐀𑐢𑑂𑐫𑐎𑑂𑐲 𑐰𑐵𑐳𑐣𑐵 𑐐𑐸𑐬𑐸𑐒, 𑐰𑐷𑐬𑐾𑐣𑑂𑐡𑑂𑐬𑐣𑐐𑐬 𑐣𑐐𑐬𑐥𑐵𑐮𑐶𑐎𑐵 𑑗 𑐰𑐜𑐵 𑐳𑐡𑐳𑑂𑐫 𑐫𑐵𑐩𑐣𑐵𑐬𑐵𑐫𑐞 𑐁𑐔𑐵𑐬𑑂𑐫, 𑐣𑐶𑐰𑐬𑑂𑐟𑐩𑐵𑐣 𑐰𑐜𑐵 𑐳𑐡𑐳𑑂𑐫 𑐳𑐸𑐬𑐾𑐱 𑐩𑐵𑐣𑐣𑑂𑐢𑐬𑑄 𑐣𑑄 𑐣𑐸𑐐𑑅𑐏𑑃 𑐟𑐫𑐵𑐡𑐷𑐐𑐸 𑐏𑑅 𑑋
𑐳𑐩𑐵𑐥𑐣 𑐖𑑂𑐫𑐵𑐗𑑂𑐰𑐮𑐫𑑂 𑐥𑑂𑐬𑐱𑐶𑐎𑑂𑐲𑐵𑐬𑑂𑐠𑐷𑐟𑐫𑑂𑐳𑑄 𑐎𑐸𑐩𑐵𑐬𑐶, 𑐮𑐵𑐏𑐾𑐮𑐶𑐳𑐾𑑄 𑐠𑐷𑐠𑐷 𑐴𑐸𑐮𑐵𑐥𑑂𑐫𑐵𑐏𑑄 𑐣𑑂𑐴𑑂𑐫𑐧𑑂𑐰𑑅𑐐𑐸 𑐏𑑅𑐳𑐵 𑐢𑐶𑐩𑐾 𑐧𑐵𑐖𑑄𑐫𑐵 𑐥𑑂𑐬𑐳𑑂𑐟𑐸𑐟𑐶 𑐣𑑄 𑐧𑐶𑐄𑐐𑐸 𑐏𑑅 𑑋