“𑐴𑐮𑐶𑑄 𑐣𑐾𑐰𑐵𑑅 𑐡𑐶𑑄” 𑐕𑐸 𑐏𑑅?

𑐰𑐬𑑂‍𑐮𑑂𑐜 𑐣𑐾𑐰𑐵𑑅 𑐀𑐬𑑂‍𑐐𑐣𑐵𑐂𑐖𑐾𑐱𑐣 (𑐜𑐧𑑂𑐮𑐹𑐊𑐣𑐌) 𑐫𑐵 𑐩𑐸𑑃𑐖𑑂𑐫𑐵𑑄 𑐴𑐬𑐾𑐎 𑐡𑑃𑐫𑑂 𑐩𑐵𑐬𑑂‍𑐔𑐫𑐵 𑐮𑐶𑐥𑐵𑑄𑐐𑐸 𑐱𑐣𑐶𑐰𑐵𑑅 “𑐴𑐮𑐶𑑄 𑐣𑐾𑐰𑐵𑑅 𑐡𑐶𑑄” 𑐴𑐣𑐾𑐐𑐸 𑐢𑐎𑐵𑑅 𑐳𑐣𑑂 𑑒𑑐𑑑𑑗 𑐫𑑂 𑐎𑑂𑐰𑑅𑐕𑐶𑐐𑐸 𑐏𑑅 𑑋 𑐄𑐐𑐸 𑐎𑐠𑑄 𑐳𑐣𑑂 𑑒𑑐𑑑𑑘 𑐣𑐶𑐳𑐾𑑄 𑐴𑐮𑐶𑑄 𑐣𑑂𑐫𑑄𑐎 𑐴𑐮𑐶𑑄 𑐣𑐾𑐰𑐵𑑅 𑐡𑐶𑑄 𑐎𑐠𑑄 𑐴𑐣𑐾𑐐𑐸 𑐖𑑂𑐫𑐵 𑐤𑑂𑐫𑐵𑑅𑐐𑐸 𑐡𑐸 𑑋 𑐏 𑐮𑐵 𑐢𑐸𑐔𑑂𑐔𑐵𑐥𑐟𑐶𑑄 𑐣𑐏𑑅𑐔𑐏𑑅 𑐴𑐣𑐵𑐔𑑂𑐰𑑄𑐥𑐶𑑄 𑐣𑐾𑐰𑐵𑑅𑐟𑐫𑑂𑐟 𑐠𑑂𑐰 𑐩𑐾𑐐𑐸 𑐕𑐐𑐹 𑐤𑐹𑐐𑐸 𑐣𑐏𑑅 𑐕𑐵𑐫𑑂 𑐩𑐵𑐮 𑐢𑐿𑐐𑐸 𑐤𑑂𑐫𑐳𑑅 𑐡𑐣𑐾𑐦𑐸, 𑐀𑐠𑐰𑐵 𑐣𑐾𑐰𑐵𑑅 𑐡𑐶𑑄 𑐢𑐎𑐵𑑅 𑐴𑐣𑐾 𑐴𑐾 𑐩𑐵𑑅𑐳𑐵𑑄 𑐣𑐾𑐰𑐵𑑅𑐟𑐫𑑂 𑐣𑐏𑑅𑐔𑐏𑑅 𑐩𑐢𑑂𑐫𑐫𑑂 𑐕𑐐𑐹 𑐮𑑂𑐫𑐫𑐵𑑅 𑐄𑐐𑐸 𑐡𑐶𑑄𑐫𑐵𑐟 𑐴𑐾 𑐴𑐮𑐶𑑄 𑐣𑐾𑐰𑐵𑑅 𑐡𑐶𑑄 𑐢𑐎𑐵𑑅 𑐴𑑄𑐳𑐵𑑄 𑐖𑑂𑐫𑐹 𑐢𑐎𑐵𑑅 𑐣𑑄 𑐧𑐶𑐔𑐵𑑅 𑐰𑐫𑐾𑐦𑐸 𑑋
𑐠𑐸𑐐𑐸 𑐡𑐶𑑄 𑐴𑐣𑐾𑐐𑐸𑐫𑐵 𑐩𑐹 𑐟𑐵𑐟𑐸𑐣𑐵 𑐢𑐫𑐵𑐐𑐸 𑐴𑐾 𑐴𑐮𑐶𑑄𑐣𑑂𑐫𑑄𑐎𑐫𑐵 𑐣𑐾𑐰𑐵𑑅𑐟 𑐕𑐠𑐵𑐫𑑂 𑐩𑐸𑐣𑐵𑑅 𑐣𑐾𑐰𑐵𑑅 𑐨𑐵𑐫𑑂, 𑐳𑑄𑐳𑑂𑐎𑐺𑐟𑐶 𑐰 𑐀𑐢𑐶𑐎𑐵𑐬𑐫𑐵 𑐮𑐵𑐐𑐶 𑐳𑑅 𑐠𑑂𑐰𑐫𑐾𑐎𑐾𑐐𑐸 𑐩𑐵𑐢𑑂𑐫𑐩 𑐎𑐠𑑄 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐏𑑅 𑑋 𑐠𑑂𑐰 𑐴𑐣𑐾𑐖𑑂𑐫𑐵𑐫𑐵 𑐩𑐾𑐐𑐸 𑐁𑐖𑑂𑐖𑐸 𑐰𑐶𑐱𑐾𑐲 𑐫𑐵𑐣𑐵𑑅 𑐰𑐶𑐡𑐾𑐱𑐫𑑂 𑐕𑐪 𑐣𑐾𑐰𑐵𑐮𑑄 𑐩𑐾𑐪 𑐣𑐾𑐰𑐵𑑅𑐫𑐵𑐟 𑐪𑐳𑐷𑐎𑐾𑐐𑐸 𑐮𑐵𑐐𑐶 𑐡𑐧𑐹 𑐎𑐠𑑄 𑐰𑐶𑐎𑐵𑐳 𑐫𑐵𑐫𑐾𑐐𑐸 𑐏𑑅 𑑋
𑐣𑐾𑐰𑐵𑑅𑐟𑐫𑑂𑐳𑑄 𑐡𑐾𑐳𑑄𑐥𑐶𑐣𑐾 𑐰𑐵 𑐡𑐸𑐣𑐾 𑐠𑐷𑐠𑐷 𑐣𑐏𑑅𑐔𑐏𑑅 𑐴𑐣𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑑁𑑄𑐎𑐤𑐫𑑂 𑐀𑐩𑐾𑐬𑐶𑐎𑐵𑐫𑑂 𑐫𑐾𑑃𑐫𑐵𑑅𑐥𑐸𑐤𑐶, 𑐳𑐶𑐠𑐶𑐣𑐏𑑅, 𑐳𑐵𑐥𑐵𑐬𑐸, 𑐥𑐵𑐴𑐵𑑄𑐔𑑅𑐴𑑂𑐬𑐾, 𑐫𑑅𑐩𑐬𑐶𑐥𑐸𑐤𑐶 𑐁𑐡𑐶 𑐣𑐏𑑅 𑐴𑐣𑐵𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐀𑐠𑐾𑐴𑐾 𑐎𑑂𑐫𑐵𑐣𑐵𑐜𑐵, 𑐀𑐲𑑂𑐚𑑂𑐬𑐾𑐮𑐶𑐫𑐵 𑐰 𑐫𑐹𑐬𑑀𑐥𑐫𑐵 𑐠𑐷𑐠𑐷 𑐡𑐾𑐱𑐫𑑂 𑐣𑑄 𑐠𑐖𑑂𑐫𑐵𑑅𑐐𑐸 𑐣𑐏𑑅𑐔𑐏𑑅 𑐴𑐣𑐾𑐐𑐸 𑐀𑐥𑑂𑐰𑑅𑐐𑐸 𑐡𑐸 𑑋 𑐣𑐾𑐰𑐵𑑅𑐟 𑐡𑐸𑐐𑐸 𑐥𑑂𑐬𑐵𑐫𑑅 𑐡𑐎𑑂𑐰𑑄 𑐢𑐿𑐠𑐾𑑄 𑐡𑐾𑐱𑐫𑑂 𑐠𑑅𑐥𑐶𑐣𑑂𑐳𑑄 𑐪𑐥𑐸𑐖𑐵 𑐫𑐵𑐫𑐾𑐐𑐸 𑐖𑑂𑐫𑐵 𑐤𑐵𑐥𑐵𑑄𑐣𑐶𑐳𑐾𑑄 𑐴𑐾 𑐖𑐸𑐫𑐵 𑐰𑐫𑐵𑐔𑑂𑐰𑑄𑐐𑐸 𑐡𑐸 𑑋 𑐠𑐖𑑂𑐫𑐵𑑅𑐐𑐸 𑐠𑐷𑐠𑐷 𑐣𑐏𑑅𑐔𑐏𑐟𑐫𑑂 𑐡𑐎𑑂𑐰𑑄 𑐖𑑂𑐫𑐵 𑐳𑑄𑐳𑑂𑐎𑐺𑐟𑐶 𑐴𑐣𑐾𑐐𑐸𑐮𑐶𑐂 𑐖𑐎 𑐎𑐾𑐣𑑂𑐡𑑂𑐬𑐶𑐟 𑐖𑐸𑐂 𑑋 𑐠𑐖𑑂𑐫𑐵𑑅𑐐𑐸 𑐣𑐏𑑅𑐔𑐏𑐟𑐫𑑂 𑐨𑐵𑐫𑑂, 𑐳𑑄𑐳𑑂𑐎𑐺𑐟𑐶 𑐰𑐵 𑐴𑐎 𑐀𑐢𑐶𑐎𑐵𑐬 𑐧𑐵𑐬𑐾 𑐏𑑃 𑐯𑐵𑐫𑐾𑐐𑐸 𑐃 𑐪𑑀 𑐖𑐎 𑐡𑐂, 𑐄𑐎𑐶𑑄 𑐡𑑃𑐫𑑂 𑐕𑐤𑐸 𑐧𑐶𑐳𑑂𑐎𑑄 𑐴𑐾 𑐡𑐶𑑄 𑐩𑐵𑐮𑐵𑑅 𑐨𑐵𑐫𑑂 𑐰 𑐳𑑄𑐳𑑂𑐎𑐺𑐟𑐶𑐫𑐵 𑐏𑑃 𑐯𑐵𑐫𑐾𑐐𑐸 𑐰𑐵 𑐳𑐔𑐾𑐟𑐣𑐵 𑐀𑐥𑑂𑐰𑐫𑐾𑐎𑐾𑐐𑐸 𑐖𑑂𑐫𑐵 𑐫𑐵𑐫𑐾 𑐦𑐂𑐮𑐵 𑐢𑐿𑐐𑐸 𑐁𑐖𑑂𑐖𑐸𑑄 𑐴𑐮𑐶𑑄 𑐣𑐾𑐰𑐵𑑅 𑐡𑐶𑑄 𑐴𑐣𑐾𑐐𑐸 𑐱𑐸𑐬𑐸𑐰𑐵𑐟 𑐳𑐣𑑂 𑑒𑑐𑑑𑑘 𑐣𑐶𑐳𑐾𑑄 𑐤𑑂𑐫𑐵𑑅𑐐𑐸 𑐡𑐸 𑑋 𑐳𑐣𑑂 𑑒𑑐𑑑𑑘 𑐫𑑂 𑐴𑐮𑐶𑑄 𑐣𑐾𑐰𑐵𑑅 𑐡𑐶𑑄 𑐏𑐸𑐤𑐸 𑐴𑐮𑐶𑑄𑐣𑑂𑐫𑑄𑐎 𑑒𑑒 𑐐𑐹 𑐠𑐵𑐳𑐫𑑂 𑐠𑐷𑐠𑐷 𑐖𑑂𑐫𑐵𑐗𑑂𑐰𑑅 𑐫𑐵𑐳𑐾𑑄 𑐴𑐣𑐾𑐐𑐸 𑐖𑑂𑐫𑐵 𑐖𑐹𑐐𑐸 𑐡𑐸 𑑋 𑐠𑐸𑐐𑐸 𑐡𑑃𑐫𑑂 𑐣𑑄 𑐣𑐾𑐥𑐵𑐮, 𑐀𑐩𑐾𑐬𑐶𑐎𑐵, 𑐎𑑂𑐫𑐵𑐣𑐵𑐜𑐵, 𑐧𑐾𑐮𑐵𑐫𑐟, 𑐴𑑄𑐐𑐎𑑄𑐐, 𑐀𑐲𑑂𑐚𑑂𑐬𑐾𑐮𑐶𑐫𑐵, 𑐫𑐹𑐊𑐂, 𑐥𑑀𑐬𑑂‍𑐚𑐸𑐐𑐮𑐮𑐐𑐵𑐫𑐟 𑐠𑐷𑐠𑐷 𑐡𑐾𑐳𑐫𑑂 𑐴𑐮𑐶𑑄 𑐣𑐾𑐰𑐵𑑅 𑐡𑐶𑑄 𑐟𑑅𑐖𑐶𑐎 𑐴𑐣𑐵𑐔𑑂𑐰𑑄𑐐𑐸 𑐡𑐸 𑑋

@Subash https://www.facebook.com/subhash